645/2026-2027 

Dated Aizawl, the 21st May, 2026: Vawiin khan Tourism Department huaihawtin Economics & Statistics Department Conference Hall, MINECO, Khatla-ah State Level Consultative Workshop on 'Developing Global Standard Tourist Destinations' neih a ni a, workshop hi Tourism Minister Pu Lalnghinglova Hmar chuan a hmanpui a ni.

India ram chhunga State leh Union Territory tina khawvel hmun dangte el phak khualzinte tlawh duhna hmun(tourist destination) pakhat tal neih tura Sorkar laipuiin a rel angin, Mizoram tana hmalak dan tur sawiho turin he workshop hi buatsaih a ni.

He hunah hian Minister Pu Lalnghinglova Hmar chuan thu sawiin, Mizoram-ah hian Tourism hian potential nasa tak a nei a, chu chuan State leh a economy hmasawnna atan pawh nasa takin a thawh theih thu a sawi a. Hemi rual hian Minister chuan khualzin hip nan leh he sector tihhmasawn zel nan hian thil pawimawh tak tak ngaihtuah tur a awm a ni, a ti. Minister chuan tourist-te hnenah Mizorama hmun tlawh tur hrang hrangte, tlawh hun tha ber leh tlawh chhan turte dik taka hrilh an ngaih thu a sawi a; hemi atana Tourism Department-in Mizoram Tourism Calendar an siam chu fakin, kalkhawmte chu an ngaihdan leh rawtnate inthlahrung lova thawhkhawm turin a sawm bawk a ni.

Pu Lalnghinglova Hmar chuan Tourism hian khualzinte tlawh hmun chauh ni loin, a chhehvela hmun dangte leh mite thlengin hlawkna a pe a ti a. Hemi avang hian Minister chuan he sector-ah hian Sorkar hnathawk ni lo midang ruat (outsourcing) leh khawtlang mipuite (community) nena tantlan a pawimawh thu a sawi a ni. Minister chuan hospitality leh transport sector-a hna thawktute chuan an sumdawnna chu dik leh thianghlim taka kalpui turin a fuih a. Mizoram mipuite chu an ram mawina leh zia-rang leh nunphung (cultural heritage) te vawng nung leh humhalh tlat tur leh mahni state chhunga khualzinna hmun te ngai hlu turin a chah a. Hei hian State pawn lam mikhualte hip nan leh tourism sector tihhmasawn nan nasa takin a tanpui dawn tih a sawi a ni.

Commissioner & Secretary to CM Pu Vanlaldina Fanai pawhin Mizoram chu khualzinte hip thei hmun danglam leh mawi tak a ni a ti a; amaherawhchu, Mizoram tourism sector hi tun thlengin 'hlu si, tlawh tlem' ('High value, low footfall') sector a la nih thu a sawi a. Mizoram tourism tihhmasawn lehzual nan Pu Vanlaldina Fanai chuan kan thawh rim lehzual a ngaih thu te, hmun dangte tihdan tha (best practices) zir a ngaih thu te, khawtual mipuite nen thawh hona tha neih a  tul thu te, mamawh dan anga hna insem te, leh state danglam bikna (uniqueness) te chawilar thiam a pawimawh thu a sawi a ni.

Vawiin hunah hian Tourism Department Additional Secretary Pi Irene Zohlimpuii Chongthu chuan kalkhawmte lo lawmin Sorkar laipui chuan India ram chhunga State leh Union Territory tinah 'world-class tourist destination' pakhat theuh tal neih tir a tum thu a sawi a. Chumi atana hma an lak tawhna te tarlangin an hmachhawp te a sawi bawk. Hemi hnuah hian Tourist Officer Pi R. Lalrinchhanin PowerPoint Presentation hmangin world-class tourist destination ni tura thil tulte a sawi fiah a ni.

He hunah hian kalkhawmte chuan an ngaihdan leh rawtnate sawihona hun an hmang a. OSD to CM Pi R. Lalrodingi chuan tourism department hi department dang hrang hrang nen tangkawp a thawk lo thei lo a nih avangin department hrang hrang karah thawhhona tha a awm zui zel a duh thu a sawi a. Mizoram mikhual te chu ram leilung fate ngeiin kan lo mikhual tur a ni tiin vawiin hun hi a khar a ni.