644/2026-2027

Siaha the 21st May 2026 : Electoral roll dik leh felfai a awm theih nana Election Commission of India (ECI) in kum 10 dana a buatsaih thin Special Intensive Revision (SIR) chungchanga thutkhawm chu vawiin khan DC mini conference hall, Siaha-ah District Bawrhsap Pu VL Hruaizela Khiangte, District Election Officer (DEO) ni bawk kaihhruainain neih a ni.

DEO Pu VL Hruaizela Khiangte chuan political party aiawh kalkhawmte chu democracy ramah an pawimawh hle thu a sawi a, e roll felfai leh thianghlim a awm theih nan fimkhur hle tur leh duhsakna avanga roll a thun lo turin a fuih a ni. Tupawh India khua leh tui ni a, kum 18 tling tawh chu roll a thun theih an ni a, vote neih chu ram rorelna kawng sial kawngah an dikna chanvo a ni tiin roll a chuang tawh chu paih leh a harsa hle a, raltlante leh India khua leh tui nilo te thun palh an nih loh nan in venga, theihtawp chhuah turin a chah a ni.

Election Officer Pu Vabeimozachhi Chozah pawhin Special Intensive Revision nihphung tlangpui sawifiahna a nei a, draft roll tarchhuah a nih hun tur te, claims and objections chungchangte leh final roll tarchhuah a nih hun tur te a tarlang.

 Political Party aiawh kalkhawmte chu Booth Level Agent ruat theuh tura chahin roll felfai tak a awm theih nan thawhhopuiah a sawm bawk a ni.

ECI chuan Mizoram Special Intensive Revision chu May ni 20 atanga September Ni 6, 2026 thleng neih turin a puang a, qualifying date atan July Ni 1, 2026 chu hman a ni. May Ni 30- 28th June 2026 chhungin BLO ten in tin tlawh chhuahna an nei anga, draft roll tarchhuah hun tur chu July Ni 5, 2026 a ni ang. Final e roll tarchhuah hun tur chu September Ni 6, 2026 a ni.

SIR neih turah hian e roll a thara siam a ni dawn a, vote nei tawh tan pawn enumeration form hmangin e roll ah hming ziahluh dilna thehluh tur a ni. BLO ten enumeration form hi in tinah an sem dawn a ni.

Siaha District ah hian ERO atan Pu M Misael (DRDO PD) leh Pu Abraham Beirazi Khithie (Addl DC) te ruat an ni a, AERO atan Pi H Lalenkawli (SDC) leh Pu Z Lalnghaktluanga (SDC) te ruat an ni bawk a ni.