643/2026-2027

Dated: Mamit the 21st of May, 2026 : Vawiin khan Chhim Veng YMA Hall, Mamit-ah TEJAS (Transforming Entrepreneurial Journeys Across States & Districts) District Awareness Programme chu Er.H.Lalzirliana, Mamit Bialtu MLA chuan Khual lian niin a hmanpui. He programme hi Startup India, Department for Promotion of Industry and Internal Trade (DPIIT), Ministry of Commerce & Industry, Government of India, Mizoram Startup Mission (MSUM), Planning & Programme Implementation Department, Government of Mizoram leh Mamit Deputy Commissioner te ṭang ho huaihawt a ni a, entrepreneurs hlawhtling leh department hotute atangin thu ngaihthlak a ni.

Er. H. Lalzirliana chuan he awareness programme hi Mamit district hmasawnna atan a pawimawh thu sawiin kan theihna(potential) kan neih that haichhuhna atan tangkai taka hmang turin zirlai kalte chu a chah a. Sawrkar Laipui chuan kum 2047-ah chuan India ram hi ram changkang (developed country) leh intodelh rama hlangkai tumin a bei mek a,hemi kawngah hian Mizoram pawhin nasa takin hma kan lak a ngai a, hna zawngtu mai ni loin hna siamtu nih kan tum tur a ni a ti. Mamit bialtu MLA chuan kan khawvel changkang zelah chuan a che rangin hlawhtlinna an chang a, thawhrimna bakah fing leh remhre taka hnathawh a ngai a, smart work a pawimawh tawh hle a ni a ti a.Khawvel inher danglam zelah kan ngaihtuahna te,kan thil thlir dan leh lehkha kan zir dan thlengin kan her danglam ve zel a ngai a, hlawhltlinna nei tur chuan duhna (drive) a san a ngai a, kan tumah hlawhtling lo thin mah ila  beidawng loa beih hram hram nun neih a ngai a ni a ti.

Pu Suvigya S Chandra, District Bawrhsap chuan hun hmanpuiin sumdawnna lama eizawnna tan tur hian tlai luat a awm lo a, tumna a awm chuan theih loh a awm lo a ni a ti a, zirlai kalte hnenah chuan TEJAS awareness programme chu hlawkthlak taka hmang tur leh zawhna an neih angte chu zawt turin a chah a ni.

Vawiin programme-ah hian department hrang hrang atangin an hmalakna ngaihthlak a ni a, MSUM atangin TEJAS ina a tum bakah Startup India leh Mizorama entrepreneurs te than len  theihna kawng te ngaihthlak a ni bawk. Chawhnu session-ah hian “Master class on Supply Chain Management & Made by Mizo””Master Class on Book-keeping & overview of GST” bakah “Overview of Mizoram Banakaih Venture Capital Fund” tih thupui hmangin mi thiamte hnen atangin thu ngaihthlak a ni a, zawhna leh chhanna hun hman a ni bawk.

Vawiin hunah hian zirlai 80 chuang bakah sumdawnna kalpui mek leh bul ṭan tum te leh hemi lama tui te telin mi 180 chuang an ni.