642/2026-2027 

Dated Aizawl, 21^st May, 2026: Vawiin khan Rural Development & Administration Department (RD&AD) buatsaihin Mizorama a vawi khatna atan Vanapa Hall-ah VC Hmeichhe Inkhawmpui "State Level Convention for Women Elected Representative of Village Councils" hman a ni a. He hunah hian Health & Family Welfare Department Minister Pi Lalrinpuii chu khuallian niin hun a hmanpui a, RD&AD Minister Prof. Lalnilawma chu khualzahawm a ni. He hun hi Sawrkar laipui leh Mizoram Sawrkar-in tualchhung inrelbawlnaa hmeichhiate hmun pawimawh tak luah tura a ngaihtuahna a sen kalpui mek denchhena buatsaih a ni.

Khuallian Minister Pi Lalrinpuii chuan hmanlai leh tunlai hun thlirin hmeichhiate dinhmun a that chhoh zel thu a sawi a. Hun a lo inthlak danglam zel rualin ram pum thlir erawh chuan hmeichhe dinhmun hi a lo la hniam hle a ni, a ti. India rama hmeichhia sulhnu nei thate chungchang sawiin, Mizo hmeichhe zingah pawh ram leh hnam tana hruaitu ropui Pi Ropuiliani’n sulhnu a neih that thu a sawi a, hetiang hruaitu tha tak tak lo awm tawh mah se hmeichhiate tana hmasawnna tur kawng tam tak a la awm tih a sawi.

Khuallian chuan thusawi chhunzawmin, hmeichhiate chawikan an nih theih nan 73^rd leh 74^th Amendment Act hmangin Panchayat leh tualchhung inrelbawlnaah 33% women reservation a awm a ni, a ti a. Parliament pawhin kum 2023 khan hmeichhiate tan 33% reservation a lo pass tawh thu sawiin, tun hnuah Mizo hmeichhiate zingah hruaitu tha leh fel tak tak thahnem tak an awm hi chhuanawm a tih zia a sawi bawk. Hmeichhiate dinhmun a lo that zel rual hian mawhphurhna sang tak an nei chho zel a ni, a ti a. Village Council hmeichhe hruaitute chu mahni inring tawk leh lu zo taka an nihna hlen chhuak ngei turin a fuih a. Mipui thlan tlin an nihna angin mipuite tan rinawmna nena hna thawk tur leh, tualchhung inrelbawlna kawnga a chhia leh hmaih awmte siam tha turin a chah a ni. Tualchhung sawrkar hmalakna hrang hrangah hmeichhiate chu sulsutu leh hma latu ni turin a fuih a, an theihna zawng zawngin mipui, khawtlang leh ram tan theihtawp chhuah zel turin duhsakna a hlan a ni.

Khualzahawm Minister Prof. Lalnilawma chuan Mizote zingah hmeichhiate chawisan a an awm chu a lawmpui thu a sawi a. Hmeichhiate chu thawhhonaah an tangkai mai bakah an pawimawh hle a ni, a ti. VC hmeichhe hruaitute kalkhawm hnenah VC fund an dawn te chu khawtlang hmasawnna a hmang turin a chah a, own source of revenue pawimawhna te sawiin a tulnaah chuan Department-in a lo puih tur thu a sawi a. Minister chuan VC hmeichhe inkhawmpui hmasa bera a tel thei chu lawmawm a tih thu sawiin, thawhhona tha an neih theih nan duhsakna a hlan a ni.

He inkhawmpuia khualthate (distinguished guests) - MLA, Aizawl South III Assembly Constituency Pi Baryl Vanneihsangi leh MLA, West Tuipui Assembly Constituency Pi Prova Chakma te hnen atang thusawi pawimawh tak tak ngaihthlak a ni bawk.

Local Administration Department Director Dr. Lalngura Tlau hnen atangin inkhawmpui tum leh report ngaihthlak a ni a. Director chuan sorkar hmalakna thar tarlangin, chipchiar takin ‘The Mizoram Village Council Act, 2025’ kan neih tawh thu a sawi a. He dan thar hi India rama Panchayati Raj system zul zuia duan a nih thu sawiin, Panchayati Raj-in subject 29 a neih chu Mizoram dan tharah pawh subject 22 dah a nih thu a tarlang. Sawrkar Laipuiin Gram Panchayat hnuaia a duan Own Source of Revenue (OSR) chungchang pawh sawiin, tualchhung khuate an lo intodelh a, mahni kea an intun din theih nan OSR neih tam theih dante, chhiah khawn dan hrang hrang leh sum tihpun theihna kawng hrang hrangte he dan thar hian a hrilhfiah vek a ni, a ti. Dr. Lalngura Tlau chuan LAD scheme Rashtriya Gram Swaraj Abhiyan (RGSA) hnuaia Capacity Building and Training kalpui mekah thla tin training a kal theih thu a sawi a. District 8-ah District Panchayat Resource Centre siam tawh niin, VC hmeichhe hruaitute chuan thlahthlam lova training hi kal turin a chah a. Panchayat Bhavan (VC Office) sak mek a nih thu sawiin, kumin chhung chauh pawh hian hmun 40 ah sak a nih tawh chu lawmawm a tih thu a sawi bawk.

District pakua Village Council dinhmun tlangpui a sawite chu hetiang hi a ni:-
 Total seats - 2414, General seats - 1799 Reserved seats - 615. Autonomous District Council (ADC) Area dinhmun:- CADC Area: Total seats - 516, General seats - 428, Reserved seats - 88 niin, LADC Area: Total seats - 595, General seats - 496, Reserved seats - 99 a ni a. MADC Area: Total seats - 591, General Seats - 492, Reserved Seats - 99 a awm a ni.

Vawiin Vanapa Hall-a "State Level Convention for Women Elected Representative of Village Councils" hlawhtling taka hman takah hian Mizoram chhung hmun hrang hrang atangin VC Hmeichhe hruaitute (Women Elected Representatives) 503 zet an tel a. Director chuan hetiang zat hmeichhe hruaitu kalkhawm thei, za zela 55 (55%) lai an tling thei chu lawmawm a tih thu leh Mizo hmeichhiate tan chhuanawm tak an nih zia a sawi a ni.

Vawiin hun ti hlawhtling tura Sawrkar hmalakna tarlangtu "Women Friendly GP Video Clip" thlir ho a ni a, RD&AD Commissioner & Secretary Pu R. Zarzosanga chuan chawhma inkhawm hi kaihruaiin, Joint Director & SNO RGSA, Directorate of LA, RD&AD Pu Lalchawimawia chuan lawmthu sawiin hun a khar a ni.

Chawhnu lamah hun hmang chhunzawmin Director, Administrative Training Institute (ATI) Pi Rita Lalnunmawii Pachuau hnen atangin "Roles and responsibilities of WERs in local economic development & social justice" tih thupui pawimawh tak hmangin Motivational Speech hlawkthlak tak ngaihthlak a ni a.

Hemi bakah State Panchayat Resource Centre (SPRC) hovin tawnhriat inhrilhna leh sawihona "Experience Sharing & Discussion" hun hlawkthlak tak hman a ni a, khaw hrang hranga hmeichhe hruaitu kalkhawmte chuan tualchhung inrelbawlna kawnga an harsatna tawnte leh hlawhtlinna hrang hrangte inhrilh tawnin, inkawmhhona hlawkthlak tak an nei.

Joint Director (P), Directorate of LA, RD&AD Pu S.T. Lalhmingmawia chuan inkhawmpui kharna thu sawiin hun a ti tawp a ni.