641/2026-2027

Dated Serchhip, the 21^st May 2026: Special Intensive Revision chungchangah vawiin khan Serchhip District chhunga Political Party hrang hrangte pualin Training pawimawh tak DC Meeting Hall, Serchhip-ah buatsaih a ni. District Election Officer Pu Paul L. Khuma’n kaihruaiin, Serchhip District-a Political party hrang hrang – ZPM, INC leh MNF hruaitute an tel a ni.

Bawrhsap Pu Paul L. Khuma chuan training huaihawt a nih chhan sawiin, SIR chu Electoral Roll thenfai leh siam that hna Election Commission of India atanga hmalakna kal mek a nih thu a sawi a. Electoral Roll thar siam nana in tina kala (house-to-house visit), voter-te hming, kum, leh nihnate ziah luh thar hna (enumeration), langtlang tak leh fimkhur taka kalpui tur a nih thu sawiin, Political party aiawh kalkhawmte chu thawh hona tha tak neih puiah a sawm a; Serchhip mipuite pawh Special Intensive Revision kalpui mek hi ram hnuk khawih thil tak meuh a nih avangin lo ngai pawimawh theuh turin a sawm bawk a ni.

Vawiin training-ah hian Election Officer Pi Lalchhanhimi’n SIR chungchanga thil pawimawhte sawi zauna leh zirtirna a nei a, tun dinhmunah Serchhip District chu Electoral roll-a hming thlunzawmna (mapping) kawngah Mizoram-ah a titha ber niin, 91% chuang mapping tih zawh tawh a nih thu a sawi. 

Nimin May ni 20, 2026 atang khan Special Intensive Revision hi tan niin, May ni 30 – June ni 28, 2026 chhungin Booth Level officer (BLO) ten in tin tlawh chhuaka   Enumeration Form sem leh lakkhawm hnate an thawk tan dawn a, Political party hrang hrang aiawh Booth level Agent (BLA) ten BLO te hi an tawiawm dawn a ni. July ni 5-ah Draft Roll tih chhuah a ni dawn a, siam that ngai leh complain neite tan August ni 8 thleng hun hawn a ni anga, September ni  6, 2026-ah Final E-Roll tih chhuah a ni ang. Enumeration Form submit lote chu E-Roll-ah an hming a chuang ve dawn lo a ni.