No.1067/2020-2020

Vawiin khan Agriculture minister Pu C Lalrinsanga hova Kolasib district a Covid-19 inkharkhipna avanga loneitute harsatna enpui a fehchhuak, SEDP Agriculture Development Board te chuan SDAO, Bilkhawthlir hmunhma thawmthat ngaite leh Agriculture Rest house sak that dan turte an enho a. Kolasib district a leilet neituten Covid-19 avanga hnathawk chhawr tur, leilet a hman tur bawng leh leilehna tur khawl an neihloh avanga harsatna an tawh te sutkian a nih theih nan, a thlawn a hman tur Bilkhawthlir a Custom Hiring Centre a tractor a vailiam.

Agriculture minister Pu C Lalrinsanga chuan Custom Hiring centre kalphung tlangpui sawi langin, CHC chu leilet a khawl hmang a hnathawk turin, mimal nilovin, pawl hnen a hlan a nih thu a sawi a. Centre enkawltute leh leilet neituten tangkai tak a an hman theihna tur a duan a nih thu sawiin a nihna tur a hmang lo te chu laklet leh theih a nih thu a sawi bawk a ni. "Leilet nei, hripui vanga hnam dang an chhawrte'n an haw san avanga leilet thei lote sawrkarin lei a leh sak dawn a ni," Agriculture Minister Pu C Lalrinsanga chuan a ti. Minister chuan Covid-19 hian Mizoram hmun hrang hrangah ei leh bar a intodelh duhna a pun tir nasat thu a sawi a, leilet zau tha tak tak neitute pawhin mahni leileta hlawkna teltu nih tum a hma la turin a chah bawk a ni. Kan ram chhunga thlai chi kan intodelh theih nan Agriculture department hnuaia Research and Development kaltlangin ngawrh tak a hmalakna kalpui mek a nih thu Pu C Lalrinsanga chuan a tarlang bawk a ni.

Serlui bialtu MLA Pu Lalrinsanga Ralte chuan Bilkhawthlira leilet neitute harsatna hria a Agriculture Minister kaltlang a Sawrkar hmalakna chu lawmawm a tih thu a sawi a, Sawrkar hmalakna a lawmthu kan sawi ve theihna tha ber chu hlawhtlinpui tum a kan tih ve tur tha tak a tih hi a ni, a ti. He hmalakna hian loneitute hnenah chona thar pe se, sawrkara lawmthu kan sawi ve nan buh leh thlai tharchhuah kawngah hmasawnna kan hmuh ngei ka beisei a ni, a ti bawk.

Custom Hiring Centre Tractor vailiamna hun hi Pu J Rothanga, DAO, Kolasibin a kaihruai a, Covid-19 avanga leilet neituten harsatna hrang hrang an hmachhawn mek chu CHC kaltlang a engngemaw chen sutkian a nih ngei a beisei thu a sawi a, bawng leh hnathawk tur a mihring aiah khawl chu uar zawk a hman a nih chhoh zel nana hmalakna pawimawh tak a nih a beisei thu a sawi bawk a ni.

Covid 19 avang in Kolasib district chhunga leilet neitute zing ah harsatna tam tak lo piang chhuak enfiah tur in Minister Pu C. Lalrinsanga leh Agri Development Board member ten Kolasib, Bilkhawthlir, Bairabi leh Bukpui tlangdung te chu ni 13-15 May khan an tlawh a. Lockdown avangin Leileh na tur bawng neilo te, khawl nei lo te, leilet enkawltu vai neilo te an lo awm thar ta teuh mai a, chu chuan leilet tam tak chu buh chin theih lohin a awm phah mek a ni. He harsatna chingfel turin helai chhehvel a Custom Hiring Centres awm mekte hmang tangkaiin loneitute ram siam sak turin Pu C. Lalrinsanga Minister chuan vawiin hian tractor 5 a vai liam a. Heng khawl te hian loneitu harsatna nei te ram a lehsak don a ni. DAO, Kolasib tarlan danin tun dinhmun ah hetiang ang harsatna tawk mek hi chhungkaw 123 an awm mek a, ram hactare 151 a zau anga chhut a ni. Minister hian Phaipheng( Bilkhawthlir) zau a tractor hnathawh a enpui bawk. Minister chuan Custom Hiring Centres te chu taima taka hnathawk tur leh loneitute harsatna lo ngai pawimawh zel turin a chah a, a tul angin Centre pek belh zel theih a ni a ti bawk. Bairabi Task Force ten a tul apianga an hman turin Bairabi North leh South VLTF te hnenah Cheng 5000 ve ve a hlan a. Bairabi Zophai leh Mamit district chhung a Saikhawthlir leh Suarhliap tlawh bawkin loneituten harsatna hrang hrang an lo thlen bawk.