Directorate of Geology and Mineral Resources leh Science and Technology Department buatsaihin vawiin khan Aijal club-ah Parliamentary Secretary Pu Joseph Lalhimpuia hovin Mizorama leimin chungchanga inrawnkhawmna ‘Consultation Meeting on  Landslides in Mizoram’ neih a ni.

Pu Joseph Lalhimpuia chuan Mizoram harsatna chu khawvel hmun dang pawhin an tawh ve zen zen loh a ni a, kan ram leilung a ngheh loh avangin mithiamte’n thurawn min pek that a ngai a ni, a ti. Ruai theh leh thil tihkhawm nikhua in disposable cup leh no kan hmang uar ta hle a, a paihdanah kan fimkhur tawk loh avangin kan khawpui leh a chhehvel lui dungte a tibawlhhlawh nasa hle a, leilung a khawih pawi theih dan te bihchian a tul hle, a ti a. Fai nih kan tumnaah kawng sir thing leh mau sat a, hnim hringte a kawlh thei ang bera samfai hian lei chung lang man bettu ka tichhia a, hengte pawh hi enchian a, faina kan kalpui dan te pawh ennawn a tha hle a ni, Parliamentary Secretary chuan a ti bawk.

Geology & Mineral Resources Director Dr.H.Lallenmawia kaihhruai he meeting-ah hian hetiang lama zir bikna nei mi thiam mi 7- Pu Laldinpuia & Shiva Kumar, Department of Geology, Pachhunga University College, Aizawl; Pi C.Lalmuankimi, Department of Geology, Govt. Zirtiri Residential Science College, Aizawl; Pu Malsawmtluanga, Department of Geology, Lunglei Govt.College, Lunglei; Pi Cory Lalbiakzuali, Research Scholar, Department of Geology, Mizoram University leh Pu Saitluanga, Department of Geology, Pachhunga University College, Aizawl - te paper buatsaih zir ho a ni.

He Consultation Meeting hian Mizorama chhiatna lian ber leimin /lei che dinhmun te bel chiang in Mizoram tana chhenfakawm leimin dan dan tha leh Project lian tham a hrin chhuah beisei a ni.