Aizawl District Football Association (ADFA) chuan vawiin khan Tourist Lodge, Chaltlang ah Annual General Body Meeting an hmang a, an Patron Pu P.C.Lalthanliana, Minister, Social Welfare etc. chuan a hmanpui.

Khuallian Pu P.C.Lalthanliana chuan Mizo thalai football-a tui te chawikanna leh tihhmasawnna tura thahnemngai taka an hmalakna ah ADFA hruaitute chu lawmthu a hrilh a, mi te tana rawngbawlna thawk an nih hre renga taima taka thawk chhunzawm zel turin a fuih. Football tihhmasawnna tura Mizoram Sawrkar hmalakna hrang hrang te chu chhuan tham a ni tiin Minister chuan a hlawhtlinna tak tak erawh chu ADFA hruaitute kutah a innghat tlat a ni, a ti a. Football game chawikanga, a tui thalaite ei zawnna tlaka thiam tak tak tura kaihhruai hna thahnemngai taka thawk chhunzawm zel turin a chah bawk.

ADFA General Body Meeting 2015 hi an President Pu Robert Romawia’n a kaihruai a, Honorary Secretary Pu Vanlalrawna’n season kalta chhunga ADFA hmalakna Report a pe a, Finance Secretary Pu R.K.Rozidinga’n sum report a pe bawk. ADFA General Body Meeting hmang hian Aizawl District huam chhunga Thingsulthliah, Saitual, Sakawrdai, Darlawn, Sialsuk, Phullen leh Aibawk Zone atang te-in hruaitute an lo kal a ni.