Vawiin khan Parliamentary Secretary Pu Hmingdailova Khiangte chuan Kawnpui Chhim Veng YMA Hall sakna tur lungphum a phum a. He programme puala inkhawm tawite neihah Pu Hmingdailova Khiangte chuan YMA hi ram vengtu sipai tha ber a nih thusawiin Mizo thlalai te a thuikhawm dan leh khawtlang nun a kaihhruai dan ngaihtuahin Mizo hruaitu hmasa ten hmathlir thui tak neia YMA din nachang an lo hria kha a fakawm a, YMA hi a lo ding lovang tih a hlauhawm hle a ni, a ti. Mahni mihringpui te tanpuitu YMA kalpui dan rau (spirit) hi a thukin Mizo te a huapzo dan hi a ngaihsan awm tiin he huna YMA member kalkhawmte chu YMA thiltum te nunpuia YMA chu chawinunga chawivul zel turin a chah a ni.

Tukin zing khan Parliamentary Secretary hian Kawnpui Primary Health Centre (PHC) a tlawh a. A thawktu te nen inkawmhona neiin PHC dinhmun, an mamawh leh an harsatna te a thawktu ten an hrilh a, a theih ang anga hmalakpui a tum thu Parliamentary Secretary hian a sawi. Dental Surgeon, Ophthalmic Assistant leh Health Supervisor an mamawh thu te, Quarters cheithat leh damdawiin ramri hung chungchang te an thlen a ni.

Kawnpui PHC Damdawiin ah hian khum 13 ( Ward khum 10 leh Isolation Ward khum 3) a awm a. A hnuaia hian Sub-Centre 3 leh Health Clinic pakhat awmin he PHC ah hian doctor 2 awmin thawktu dang 32 (Sub-Centre te tiamin) an awm mek a ni.