Vawiin khan Lunglei BDO Conference Hall-ah Lunglei Rural Development Block chhunga Village Council thlan tharte tan ‘Orientation Programme regarding Convergence of IWMP with MGNREGA’ neih a ni.

Orientation Programme hawnna inkhawm Lunglei BDO Dr.Malsawmtluanga Fanchun kaihhruaiah Khuallian Pu Ashish Madhaorao More, DC Lunglei chuan VC thlan tharte chu lawmpuina chibai a buk a. MGNREGA hi sorkar ruahmanna (programme) pakhat mai ni lovin ‘Act’ a nih thu a sawi a, India Danpuiin MNREGA chungchanga thuneihna hi officer liante kutah dah lovin mipui hnaih bertu Village Council-te kutah a dah zawk a, chuvangin MGNREGA hnuaia hna chhawpte chu mipuite hmasawnna thlen theih tur ngei thlan thiam a ngai a ni, a ti a. Pu Ashish More chuan MGNREGA hi Job Card neite hnathawh tur a nih angin dan leh hraite hriatchian a ngai a, mi pahnih khat leh political party tana hamthatna siam tur ni lovin mipui nawlpui thatna tur ngaihtuah zawk tur a ni, a ti. MGNREGA bakah IWMP leh central scheme hrang hrangah pawh khawtlang mamawhnaah VC-te chu tang tlang thiam tur leh Social Audit-ah pawh langtlang taka sum hman dan enfiah theih turin vawn a pawimawh ang, a ti bawk. Lunglei DC chuan VC member-te chu an term kum 5 chhungin mahni huamchhunga hnathawk tha ber nih tum theuh turin a chah bawk.

Lunglei BDO Dr. Malsawmtluanga Fanchun-in thuhma a sawinaah Lunglei RD Block chhungah khawpui (urban)-ah khaw 23 leh thingtlang (rural)-ah khaw 39 a awm thu leh kum 2014-2015 chhungin MGNREGA hnuaiah ni 23 hnathawh tawh a ni tih a tarlang a. Job card nei mi 16,423 awmin Mizoram pumah Lunglei RD Block hnuaiah Job Card nei an tam ber thu a sawi bawk. Sorkarin mipuite hmasawnna atan scheme hrang hrang a ruahman thin a, hengte hlawhtling tur chuan VC ten mahni huamchhung theuha mihring chengte dinhmun an hriatchian a ngai a; chumi atang chuan scheme kalpui dan tur ruahman thiam (planning) a ni thei dawn a. VC tin ten anmahni bialah theihtawp an chhuah chuan Lunglei District hmel kan ti danglam thei dawn a ni tiin VC kalkhawmte a fuih bawk a ni.

MJA Lunglei president Pu K.Lalrinpui pawhin thu sawiin VC-te chu mipui thlan tlin an nih avangin khawtlang tan nu leh pa an ni a, khawtlang enkawl, vawnfai leh tih hmasawn nan rinawm taka an thawh a tul a ni, a ti a. VC thlan thar zawng zawngte duhsakna hlanin vantlang tana an rawngbawlnaah MJA-ten theihtawpa an thlawp zel tur thu a sawi bawk.

Vawiin Orientation Programme-ah hian Lunglei khawpui chhunga VC-te chauh koh an ni a, ni 8.6.2015 (Thawhtannni) khian Lunglei Town pawna VC-te kohkhawm an ni thung ang a. Orientation Programme-ah hian MGNREGA kaihhnawih thil hrang hrang, Labour Budget & Planning bakah Social Audit atana sum vawn dan chungchang VC member-te hi zirtir an ni.