1057/2022-2023
Champhai, the 27th June, 2022: Champhai District Leisenzo khuaa Vawk engemawzat thite thih chhan chu African Swine Fever (ASF) a ni tih finfiah a nih avangin Dr. Lalhmangaiha, Senior Veterinary Officer (SVO), Champhai chuan 'The Prevention and Control of Infectious & Contagious Disease in Animal Act 2009, Section 20 Sub-Section I in thuneihna a pek angin heng khuate hi vawiin June ni 27, 2022 atanga thuleh awm hma Vawk hrilenna hmun 'Infected Area' ah a puang.

African Swine Fever lenna hmun Infected Area a puan tak veng leh khuaah hengte hi zawm ngei tur a ni:
1. Infected Area atanga Vawk lakchhuah emaw lakluh emaw phal a ni lo.
2. Vawk thi reng reng paih mai lovin, chinai (lime) nen thuk taka phum tur a ni.
3. Infected Area huamchhungah Vawk talh leh vawksa zawrh khap tlat a ni.

Vawiina puan belh takte nen hian tun dinhmunah Champhai District chhunga veng leh khua 29 te chu Vawk hrilenna hmun Infected Area-ah puan a ni a, veng leh khua 6 atanga sample lak result ngaihchan mek a ni a. ASF hrileng leh hrileng ni ngeia rinhlelh hian District chhung khua leh veng 35 te a luhchilh mek a ni.

A.H & Vety. Department chhinchhiah danin Champhai District-a ASF hrileng thawhhnihna, kumin February ni 4, 2022 atanga hmuhchhuah a nih hnu vawiin June ni 27, 2022 thleng khan Vawk 3,114 an thi tling tawh a, fimkhur thuah Vawk 3,498 te suat an ni tawh a, Vawk thi leh fimkhur thua suat tawh zawng zawng belhkhawm zat chu 6,612 a tling tawh a ni. Vawiin bikah chuan Vawk 11 thiin, Vawk 81 suat an ni.

Vawiin June ni 27, 2022 thlenga Vawk hrilenna hmun/ Infected Area-a puan tawh Champhai District chhung khua leh veng 29 te chu hengte hi an ni:

1. Electric Veng
2. Zion Veng
3. Zotlang
4. Dinthar Veng
5. New Champhai
6. Vengthar
7. Vengsang
8. Bethel Veng
9. Dilkawn
10. Farkawn
11. Ruantlang
12. Buang
13. Melbuk
14. Vengthlang North
15. Venglai
16. Hmunhmeltha
17. Khawbung
18. Khankawn
19. Zote
20. Mualkawi
21. Khuangleng
22. Kelkang
23. Kahrawt Veng
24. Khuangthing
25. Thekpui
26. N. Khawbung
27. Dungtlang
28. Vapar
29. Leisenzo