Nikum atang khan UNO-in 15 July chu ‘World Youth Skills Day’ a puan tawh angin, vawiin khan khawvel hmundangte rualin Mizoramah pawh he Ni hi Labour, Employment & Industrial Training Minister Pu Lalrinmawia Ralte hovin hman a ni a. YMA Hall, Chanmari-a LE&IT Department huaihawt Skills Day inkhawmah hian Mizoram Youth Commission Chairman Pu T.Sangkunga chu Khualzahawm a ni bawk.

LE&IT Secretary Pu Benjamina kaihhruai inkhawmah Khuallian Pu Lalrinmawia Ralte chuan kalkhawmte ‘World Skills Day’ chibai bukin hmasawnnain a rawn ken tel internet hmanga thiltihtheihna hi a ni a, awlsam taka engkim kan hriat duh leh kan mamawhte kan banphakah a awm ta hi a chhartu tur kan nih laiin chhiatpui nan kan hmang hpalh ang tih a hlauhawm, a ti a. Thawhchhuah nei miah lo ai chuan tlem hlawh pawh a tha zawk a, nilenga cheng khat pawh nei lova awm ai chuan tlem tal hlawh thei hi a tha zawk, a ti. Mizo thalaite chu ngaihtuahna thar nei tura a duh thu sawiin Pu Lalrinmawia chuan tunlai khawvelah thiam thil bik (skill) nei hi a pawimawh em em a, Mizo thalaite pawh chhawrtlak ni turin skill nei a, mahni thiamna phochhuah thiam a, eizawnnaa hman an thiam a ngai a ni, a ti a. Mizo thalai chhuanawm tak takte chu hnathawh leh eizawnna an hmuh theihna apiangah zak miah lova thawk a, kal zel turin a chah bawk. Zirna leh themthiamthilte hi Certificate neih nan chauh hmang lovin, a thawka thawk thiam turin kan inchherchho a ngai a, ‘sum um’ ni lovin ‘sum lakluh’ hi kan thupui tur a ni zawk tiin thalaite a chah.

Khualzahawm MYC Chairman Pu T.Sangkunga pawhin thu sawiin World Youth Skills Day-in a tum ber chu thalaite chhawrtlak leh thawhchhuah nei tura kaihhruai a ni, a ti a. UK-ah skilled labour zaa 68%, Germany 75%, USA 52%, S.Korea 90% a nih laiin India-ah chuan 4.69% chauh a ni a, skilled labour tamna ram apiang an changkang a; thalaite tana skill development pawimawhna hriain sorkar laipui pawhin ruahmanna siam zel a tum a ni, a ti. MYC hnuaiah skill development project hrang hrang kalpui mekah Mizo thalai engemawzatin state pawnah hna an hmu zel a, hei hian Mizo thalaite chu skill zirtir an nih phawt chuan an duai bik lohzia a tichiang a ni, a ti.

Vawiin World Youth Skills Day hmannaah hian Best ITI Principal - Pu Lalmuanawma (ITI Aizawl), Best Instructor - Pu F.Lalduhawma (Electrician Trade, ITI Aizawl), Best Trainee - J.Lalzarzova (Carpenter Trade, ITI Lunglei) leh Best ITI - ITI Aizawl lawmmante hi Khuallian Pu Lalrinmawia Ralte-in a hlan nghal a. LE&IT Jt. Director Pu K.Valy-in lawmthu sawina neiin hun a khar a ni.