3591/2022-2023
Lunglei the 15th February, 2023 - Lunglei District huam chhunga business idea intihsiakna ‘Leitlangpui Rahbi’ 2021-2022 Micro Start Up Capital Competition a ti tha thlanchhuah Enterpreneur sawmli leh pasarih (47) te hnenah vawiin khan Lunglei HPC Conference Hall-ah Winner Certificate hlanna neih a ni a. An tanpuina dawn tur sum 75% hlan nghal an ni bawk.

Leitlang Rahbi 2021-22 winner certificate semchhuahna hun hi Pu C. Vanlalmuana, Chief Planning Officer, HPC, Lunglei in a kaihruai a. Assembly Budget session hmanga Aizawla cham mek Lunglei HPC Vice Chairman Pu Lawmawma Tochhawng chuan video kaltlanga thu rawn sawiin ‘Leitlangpui Rahbi’ 2021-2022 Lawmman dawng tura thlanchhuah entrepreneur 47-te chu hlawhtling ngei tura theihtawp chhuah tura chahin Mizoram chhim lama entrepreneurship ti hmasawn zel turin mawhphurna sang tak an nei a ni tiin dik tak leh fel taka an tanpuina sum dawn te hmang tangkai turin a chah a ni.

Pu ZD Lalnunmawia, Member, HPC Lunglei chuan ‘Leitlangpui Rahbi’ 2021-2022 Micro Start Up Capital Competition kalpui dan chungchang report a pe a. He intihsiaknaa tel tur hian mi 159 in application thehlutin an zinga mi 7 te hi Lunglei khaw pawn lam mi an ni a. Screening vawi khatna neih hnuah mi 77 te shortlist niin kumin January ni 27 khan Final Pitching neih a ni a. Hemi atang hian tanpuina sum dawng tur winner mi 47-te thlanchhuah an ni. Entrepreneur-te hmalakna zirin an sum dawn tur zat a inang lova, cheng sing nga atanga cheng nuai 2 inkar an dawng a ni. ‘Leitlangpui Rahbi’ lawmman dawngtute hi an hmalakna uluk taka vil pui thin niin kumina lawmman dawngtute pawh hi an hmalakna inspection neih leh vek a ni dawn a ni.

Leitlangpui Rahbi Micro Start Up Capital Competition hi 6th, June, 2019 khan Mizoram Chief Minister Pu Zoramthanga'n hawngin 2019-20 leh 2020-21 khan intihsiakna hlawhtling tak lo neih tawh niin a thawh khatna (2019-20) ah khan entrepreneur mi 15-te bultanna sum pek niin a thawh hnihna (2020-21) ah khan entrepreneur 23-te bultanna sum pek anlo ni tawh a ni.

Vawiin hlanna inkhawm-ah hian Lunglei HPC official leh member-te, Judge-te leh Master Trainer te an tel a ni.