3592/2022-2023
Aizawl, 15th February, 2023 : Vawiin khan India rama zirna in sang University leh College hmasawnna endiktu National Assessment and Accreditation Council (NAAC) Peer Team chuan Government Aizawl West College an tlawh a, vawiin leh naktuk (15 & 16 February, 2023) hian endik hna an thawk dawn a ni.

NAAC Team hi Dr R. Lalthangliana, Minister, Higher & Technical Education; Pi Sangchhin Chinzah IAS, Director, HTE; Dr. Lalthansangi Fanai, Jt. Director (Administration); Pu Laltanpuia, Jt Director (Administration). HTE; Prof. Benjamin Lalrinsanga (Nodal officer, NEP), THE; Dr. PL Ramliana, Secretary, Mizoram Scholarship Board leh Prof. Lalnundanga, Registrar; Prof. Lalbiakdiki, Director CDC ten an lo dawngsawng a ni.

He NAAC Peer Team member te hi Chairman Dr. Basheer Hasan, Professor, Department of Psychology, Pt Ravishankar Shukla University, Chhattisgarh niin, member coordinator chu ­Dr. VISAKHONU, Principal, Japfu Christian College, Kipfuzha, Kigwema, Kohima Nagaland a ni. NAAC atanga lo kal te hian tun hnai kum nga chhunga Govt. Aizawl West College hmasawnna chi hrang hrang an rawn endik a. Curricular- zirtir dan leh zirlaiin an hlawkpui em tih te, zirlaite tan infrastructure a tha em?, zirchhuak tawh te an chhawr tlak zel em? Thawhona a tha em? Sum an vawng fel em ? tih te, zirtirtu te’n an thiamna atangin thu ziah chhuah (publication) an nei tha em tih leh thil dang tam tak an rawn endik a ni.

India ram zirna sang Inpui te hi inthlahdah lo a an awm nan leh, zirtirna chhawrna awm an nih theih nan sawrkar laipui chuan a endiktu atan NAAC hi a din a. Hetianga titha lo leh zelthelte chu tanpuina sum an dawn tur (funding) thlengin a hrek thei a ni. Hetianga zirna in sang endik hi a awm ta reng a. Govt. Aizawl West College hi NAAC in Mizoram zirna insang awmte zinga an rawn endik hmasak ber a ni a, tuna an rawn endik hi a vawi 4-na a ni. He an endik atang hian Grading an rawn siam leh dawn a ni.