97/2023-2024

Lunglei the 13th April, 2023 - HPC Lunglei hmalakna Lunglei District huam chhunga business idea intihsiakna ‘Leitlangpui Rahbi’ 2021-2022 Micro Start Up Capital Competition lawmman dawngtu Enterpreneur sawmli leh pasarih (47) te hmalakna vawiin khan enfiah a ni.

Leitlangpui Rahbi lawmman dawngtute hi an sum dawn tur atangin 75% pek fel tawh niin he an sum dawn an hman tawh dan leh an hmalakna kal mek te uluk taka enfiah a ni a. Vawiin inspection report hi tihfela zirchian anih leh hnuah a bang 25% hi pek chhuah leh an ni ang. Lawmman dawngtute hmalakna tlangpui chu ran vulh, brick making, language hub, screen printing, Salon & spa, Fitness Centre, Paper Cup siam, videography, tomato sauce siam, audio & video studio te a ni.

Vawiin inspection ah hian Planning & Programme Implementation Department hnuaia Entrepreneurship Development Scheme Master Trainer pahnih - Pi Angnes L Khawlhring, Associate Professor LGC leh Pi C. Lalremruati, DIPRO Lunglei te, Lunglei Entrepreneur Forum President Pu V. Rokhawlkima te leh HPC Lunglei official-te an enfiah a ni.

Leitlangpui Rahbi Micro Start Up Capital Competition hi High Powered Committee (HPC) Lunglei leh Planning & Programme Inplementation Department, Government of Mizoram te tangkawp hmalakna niin 6th, June, 2019 khan Mizoram Chief Minister Pu Zoramthanga'n a hawng a. He intihsiakna kaltlang hian Lunglei District-ah mahni kutkawiha eizawnna kawnga hlawhtling chho mi engemawzat awm mekin 2019-20 leh 2020-21 khan intihsiakna hlawhtling tak lo neih tawh niin a thawh khatna (2019-20) ah khan entrepreneur mi 15-te bultanna sum pek niin a thawh hnihna (2020-21) ah khan entrepreneur 23-te bultanna sum pek anlo ni tawh a. Entrepreneur te tan hian sumdawnna kalpui dan training te pawh huaihawt thin a ni.