Mizoram Chief Minister rawtna bawhzuia I & PR Department in July 9 - 12, 2009 chhunga Kolkota khawpuia Mizo lemziak thiamte kutchhuak an pholan lemziaktute 21 hnenah vawiin chawhnu khan Chief Minister Pu Lal Thanhawla chuan Certificate leh hriatrengna a hlan.

 

 

Hemi pual inkhawm tawite I & PR Conference Hall-a neihah thu sawiin Chief Minister chuan India hmarchhak mite hi ramchhung laili zawkah hriat kan nih lehzual theih nan kan chet a ngai a ni, a ti a. Chuvangin Mizo hnam, nunphung, chetzia, ram hmelhmang, sik leh sa thlenga pholanna tha tak chu hetiang lemziak thiamte kutchhuak India ram hmun zau zawka pholan hi a ni a ti a. Mizo lemziak thiamte chu a phurpui thu sawiin khawpui lian zawka an kutchhuak pholanna kawngah sawrkarin puih a in ring reng dawn a ni, a ti. Thalaite thiamna leh an zeina te chu cho chhuah tham a awm a ni tiin Pu Hawla chuan tuna lemziak thiamte pawh hian thangtharte zingah lemziak hlutna leh tangkaina hrilh uar deuh deuh se, an kutchhuak hmang chuan Mizo hnam hi khawvel ah hriat an hlawh thei ang, a ti.

He hunah hian I & PR Minister Pu Zodintluanga leh Secretary Pu K.Lal Nghinglova te pawh an tel ve a ni.

I & PR Director kaihhruai Certificate hlanna inkhawmah hian lemziak tute lam aiawhin Pu Tlangrokhuma’n report a pe a, Department aiawhin Jt. Director Pi Lalnithangi’n Exhibition buatsaih dan leh Kolkata khawpuia hlawhtling taka tih a nih dan tlangpui a sawi bawk.

Tarlan tawh angin kha Exhibition ah khan lemziak thiam 8 leh Department aiawh te an zuk tel a, ni li chhung Mizo kutchhuak pholan khan Kolkata mipui leh lemziak lama tuimi te chuan an hlut hle a, media hrang hrang TV leh chanchinbu lamah te pawh uar takin he Exhibition hi tarlan a ni.