Mizoram sorkarin Mizoram Youth Commission Chairman atana a ruat thar, Pu Hmingdailova Khiangte, MLA lawmna inkhawm Youth Commission Office, Treasury Square a neihah, Chief minister Pu Lal Thanhawla chuan a hmanpui.
 
 

Chief Minister chuan Mizoram Youth Commission chu Chairman thar kaihhruaina hnuaiah chak zawka thalaite tan hma a lak theih nan a tulah sorkarin hma ala chho zel ang a ti a. Kan thalai ten talent chochhuah tham an neih chu sum lama harsatna kan neih thin avangin kan chochhuak thiam thin lova, sum hmuh belh theih nan te state lotteryte kan siam thin a ni a ti. Thalaite tan mahni inthunun leh zuk leh hmuama insum theih a tul thu sawiin, sorkarin engang pawhin hmala thin mahse, a mihringin kan zir loh chuan kan thleng sang thei ngailo ang a ti a. Sorkarin naupang an nihlaia zawnchhuah (catch them young) policy hi kan tih makmawh tur anih thu sawiin, Pu Hawla chuan Youth Commission hi kan tuai thar dawn a ni a ti. Sainik School din tur hi sipai officer chherchhuahna tur anih thu sawi bawkin, central service lam ti duhte tan sorkarin coaching class a buatsaih sak mek thu a sawilang bawk a. Mizote zingah thlawhna pilot kan awm mang tawh loh thu sawilangin, zirna senso tam tak ngai, hemi atana centralin post matric scholarship a rawn hawn chu zirlai ten an dawn ve ngei theih nan sorkarin tan a lakpui zel ang a ti.

Mizoram Youth Commission hi kum 2008 khan dan siama din a ni a, 13th Oct 2008 atang khan hna a thawk tan a ni. Kumin June thla thlenga a hmalakna langsar zual deuh te chu : Civil Services Coaching pek a ni a. Tunah hian Lord Krishna IAS Academy, New Delhi nen tangkawpin zirlai 120 vel hnenah Govt Aizawl College ah coaching a pe mek a. Delhi police constable ni turin thalai mi 19 a tirhte zingah 7 in physical fitness an tling a. An kal hma khan Hindi tawng zirtir an lo ni tawh bawk a ni. Ministry of Tribal Affairs ah project hrang hrang theluh a ni bawk. Tunah hian hna thawktu 11 an awm mek a ni.

Inkhawm hi Pu Zodintluanga, Minister for Sports & Youth Services in  kaihruaiin, vawiin hi kan sorkar tan ni pawimawh tak a ni a ti a, kan manifesto tih hlawhtlinna lantirtu a ni a ti. Chairman thar Pu Hmingdailova Khiangte pawh in thu sawiin, mi te lungawi tawkna tur kan tlin dawn lova, chuvangin in mi finchhuahna kan mamawh reng dawn a ni a ti.
 
 

Attachment

  • Loading attachment...