10/2023-2024

03.04.2023 : Nimin, 2.4.2023 tlai khan Mizoram Rajya Sabha MP Pu K.Vanlalvena chuan Union Minister of Environment, Forest and Climate Change Pu Bhupender Yadav chu a chenna inah hmu in Lengpui-a National Institute of Technology campus dinna kawnga harsatna tawh mekte ?awngka leh ziakin Minister hnenah hian a thlen a.

Lengpui-a NIT Campus nghet dinna tur hian kum 2020 January thla khan Union Cabinet meeting chuan sum cheng vaibelchhe 669.75 a lo sanction tawh a. Cheng vaibelchhe 334.78 lai hman ral a nih tawh hnuah Riverine Reserved Forest a ni, tia Forest Department in complaint a theh luh avangin hnathawh kal lai zawng zawng tihtawp vek a ni a. Pawisa sanction tawh atangin vaibelchhe 334.97 lai hman chhunzawm theih lohin a la tang reng a ni.

NIT zirlai, state dang atanga Mizoram rawn pantu tam tak te bakah Mizoram hmun hrang hrang atanga Mizo zirlaite chuan hmunhma tha nei lovin Chaltlang leh Durtlangah te mimal in an la luah mek a ni.

Union Minister of Forest Pu Bhupender Yadav chuan NIT Campus harsatna chungchang hi Mizoram Forest Minister Pu TJ Lalnuntluanga leh Higher and Technical Education Minister Pu Dr.R.Lalthangliana te nen pawh an sawi dun tawh thu sawiin April thla chhung ngeiin Forest Clearance hi tihfel a ni ang tih Mizoram MP Pu Vena hi a hrilh a. Minister hian Union Forest, Environment and Forest department changtu Secretary chu telephone a be nghalin NIT Mizoram harsatna sutkian hna chu ngaih pawimawh hmasak berah nei turin a hrilh nghal a ni.

Rajya Sabha MP Pu Vena hi Dr Lalthanchami Sailo, Registrar, National Institute of Technology Mizoramin a tawiawm a ni.