Mizoram Florists Association chuan vawiin khan lengpui Airport thenfai leh pangpar leh hnim hringte chei that hnatlang an nei a, member 30 chuang zet te phur takin an thawkchhuak a ni.

Mizoram Sawrkar hnuaia Civil Aviation Department nen tangkawpin Mizoram Florists Association te hian Lengpui Airport Beautification hi kum 2007, May thla atang khan an lo thawk tawh a. Mizoram Airport nuam leh mawi alo awm theih nan hian rim taka thawkin a tira luang hmun ni thin kha pangpar huan mawi takah Airport hi an chantir a, vawiin ni thlengin hnatlangin a cheimawi hna hi an chhunzawm zel a ni.

Mizoram Florists Association chuan Airport mawi leh changtlung nei tur hian khualzin leh helaia kalte chu an pawimawh vek a ni tih an sawi a. Bawlhhlawh paih kawngah te, bottle ruak, thil eina lehkha leh sarang duhdah taka paih leh kuhva eina hnu chhak te, chinai duhdah taka tahna hnuhma awm thinte chu pawi an tiin Airport fai leh thianghlim Mizoram-in kan neih theih nan i tang tlang ang u, tiin mipuite an chah a ni.