Vawiin khan Electric Veng YMA Hall-ah Government Aizawl North College chuan 30th Annual College Week Closing programme an hmanga. He huna khuallian, Sports Minister Pu Robert Romawia Royte chuan Mizo mipuiten Sports chu a hranpa hunsennah ngai tawh lovin nitin nundan phungah tihtur pakhat angah kan lakluh a hun tawh. Hei hi India rama Hnam hriselber nihna tur atan kailawn a ni a ti.

Pu Robert Romawia Royte, Minister of State for Sports, ICT, etc chuan hriselna kawngah Mizote inenfiah a hun tih a sawi a. Phailamah damdawi tlan tur leh inenkawl tura intirliam turin sawrkarin kumtin cheng vaibelchhe tam tak a seng ziah thin te hi hriselna kawngah Zoram mipuiten kan tihtur te kan tih loh vang te a ni thei tih a sawi a. Taksa insawizawi uarin zunthlum, thisensang leh natna tlanglawn tamzawk te hi chu a pumpelh theih a ni a ti. "Mizote hi hnam hrisel ber kan ni theiin ka ring a. Sports hi kan nitin nunah tihtur pakhat anga kan seng luh a. Way of life anga kan ngaih a hun tawh a. Sports kan uar chuan Healthcare a kan sum sen tam tak te hi a tlahniam thei tih hi a rinawm a ni", a ti.

Zirlaite chu an zirna kawngah tumruhna leh taihmakna nen hma an lak phawt chuan an hlawhtling ngei dawn tiin a fuih a. Tumruhna bakah thiltum neih len leh tum tihsan a ngai a. Mi tumsang vaklo ten thil ropui tak an ti ngai lo a ni a ti. Zirlaite chuan an Zirnate tha taka a zawh theih nan an huntha neih te an bawhpelh a thiang lova. Zirlai hun a tawp veleh eizawnna a intan dawn tih sawiin zirlai hun tihtawp that tawk loh hi eizawnna tha hmuh lohna a ni tiin a sawi a. Pu Robert Romawia Royte chuan zirlaite chu an hmalam hun tihchhiatsak vek theitu, politik tuinu laka inthiar fihlim tura fuihin ramnghah fakte hi a hun lova politik tuinu avanga an chhiat vek hi a thianglo a ni a ti.

Tunlai thiamna avanga hmanraw tangkai tak smartphone leh internet te pawh a chhe zawnga hmang lovin tangkai taka hman thiam tur leh thiam thil haichhuahna atana hmang turin zirlaite chu a fuih a. Tin, ama enkawl Tourism chungchang pawh sawiin 'Heritage Tourism' ngaihpawimawh mek a ni a ti a. "Mizoram mipuite chuan kan nu leh pa te emaw ka pi leh pute lo chawr chhuahna khua, thingtlang khua a ni emaw khawihmun pawh ni se. Ngaihhlut intihhmuh leh tlawhpawh zin pawimawhnate inzirtir leh turin kan in sawm a ni", a ti.

GANC Annual College Week Closing Programme-ah hian Principal Prof. S.Haukhanliana Mate hnen atangin report tawi ngaithlak a ni a. Tun din hmunah GANC-ah hian Zirlai 1203 awm mekin zirtirtu 36 leh office hnathawk 13 an awm mek a. Tunah hian Arts College hlang zingah a lianber a ni mek a. Closing Function Programme hi Tv. Lalsawia, Vice President, SU in a kaihruaia. He hunah hian MCTA, GANC Branch chuan state level leh a aia sang zawka college ti hmingthate hnenah lawmman a sem a. He lawmman hi First Inter-College Futsal Champion, GANC Team leh GANC aiawha Inter- College Folk Song Competion a pahnihna latu ten khuallian hnen atangin an dawng a. Khuallian hian College Week intihsiaknaa House Champion, first runner up leh pathumna hnenah te lawmman a hlan bawk a ni.