Mizoram sawrkar Information and Public Relations Department buatsaih ‘Mizoram Art and Photo Festival 2020’ chu vawiin tlai khan khar a ni ta. Ni hnih awh he art festival hi January ni 29 khan Information Minister Pu Lalruatkima’n Aijal Club Park-a programme tawi buatsaihah a hawng a ni.

Lemziak leh thlalak pholanna art exhibition leh photo exhibition hi tum engemawzat buatsaih a ni tawh thin a. Tun tuma neih zawh tak Mizoram Art and Photo Festival 2020 lian tham tak a neih erawh hi chu Mizorama a vawikhatna a ni. He Festival hi mipuiin an hlut hle a, ni hnih chhung hian tlawh tu mi sang chuang zet an awm. Artist te kutchhuak hi lei theih turin phochhuah a ni a, cheng nuai khat chuang man hu zet an hralh a ni.

Mizoram Art and Photo Festival 2020 hi a duh apiang tan tlawh theiha hawn a ni a. A hmunah hian artist leh thlala thiamten eng lai pawhin an thutchilh a. Painting demonstration neih a nih bakah face painting leh mahni lem ziah tir (portrait sketching) te a hmunah mi engemawzatin an tih tir a ni.

Festival ah hian lemziak thiam mi 52 telin pencil/charcoal hmanga lem ziak 15, water colour 14, acrylic oil on canvas 44, a vaiin 73 pholan niin, sculpture 6 an hung bawk a ni. Thlalak hi mi 28 te kutchhuak 165 zet pholan a ni bawk.