Vawiin khan Krishi Vigyan Kendra (KVK) Mamit buatsaihin Lengpui Village Council Hall-ah Sankalp Se Siddhi Abhiyan Sammelan neih niin Lok Sabha MP Pu CL Ruala chu khuallian a ni a, Food Civil Supplies and Consumer Affairs Minister Pu John Rotluangliana chu khual zahawm a ni.

Pu CL Ruala chuan eirukna, retheihna, chi leh chi inthliarna, firfiaka chetna leh thil thalo dang umbo a India ram thar din turin Sankalp Se Siddhi Abhiyan Sammelan-ah mipuite an pawimawh, a ti a. India ram thar din tura intiam ten an thutiam theihnghilha an thuthluang mai mai a nih chuan kan nghahhlelh leh duh em em India ram thar chu kan thleng thei lovang, a ti. Ram chhunga eizawngtu tam zawk chu kuthnathawktute an nih angin sawrkar chuan a ngai pawimawh a, Sankalp Se Siddhi Abhiyan ah pawh kuthnathawktute hmasawnna tur kawng buatsaih a ni, MP chuan a ti a.  An sumpai lak luh te a let thawka a lo pun theihnan mithiamten ngaihtuahna, sum leh tha an seng a; chutiang bawkin a chhawrtu tur mipuiten an mawhphurhna hlenchhuak a, kum 5 chhunga India thar (New India) din a nih theih nana tan la turin kalkhawmte a fuih a ni.

Khualzahawm Pu John Rotluangliana chuan Mizoram mipui za zela 80 vel zet kuthnathawka eizawngtute an nih laiin mahni tu leh fate kuthnathawk tura inzirtir erawh an tlem hle niin a sawi a. Kuthnathawktute tana chhenfakawm turin sawrkar chuan ruahmanna chi hrang hrang a siam a, hnathawh kan tum tlat loh erawh chuan hlawhtlin ngaihna a awm lo a ni, a ti. New India hlawhtlinna turin sawrkar hnathawkte aiin mipui an pawimawh hmasa ber tiin Minister chuan mahni theuh inenfiah tur leh zirna a ni emaw, kuthnathawh a ni emaw, kawng tinrengah Mizote hnam anga tan kan lak a tul tawh a ni, a ti. Pu John Rotluangliana chuan NLUP kal zelah Mizoram sawrkar chuan  mi taima leh hlawhtlin tum tak tak te tan New Economic Development Policy a siam a, hralhsuma chang thei kan ram leilung mila tharchhuah kan tihpun a tul tawh, a ti a. Ram thar kai turin mipui tha, mipui taima leh mipui rinawm kan mamawh a ni, a ti bawk.

Sankalp Se Siddhi Abhiyan Sammelan hi Mamit DC Pi Lalbiaksangin a kaihhruai a.  Kuthnathawkten hlawk zawka sum an hailuh theihna tur Sawrkar ruahmanna pawimawh tak Scientific Approach to Doubling Farmers Income by 2022 tih thupui hmangin Agriculture Jt. Director Pu Rohmingthanga Colney, Agriculture Inspector Dr.Samuel Lalliansanga, Horticulture Extension Officer Pu Lalrinsanga leh NABARD atangin Pu JD Traite ten thu an sawi a. Agriculture Directorate (R&E) Jt. Director Pu RL Thanzuala'n lawmthu sawiin hun hnung a khar a ni.

Ram zalenna sualtuten Quit India Movement an puan atanga kum 75-na puala sawrkar laipuiin Sankalp Se Siddhi New India Movement hmalakna thar a puan hi kum 2017 atanga 2022 chhung neih tur a ni a. He kum nga chhung hian India ram atangin retheihna, rawlrala chetna, chi leh chi inthliarna, sakhaw intihbingna, eirukna leh hlemhletna umbo tum a ni a. Ram zalenna sualtute hmathlir tipuitlinga, beiseina nena India ram thar an thlir lawk chu a taka tihhlawhtin tumin tan lak a ni dawn a ni.