2208/2023-2024

Vawiin Ni 7.10.2023 (Inrinni) hian Mizoram State Archive Conference Hall-ah  Lengteng bial zirna in atanga HSLC Distinction a pass zirlai 8(pariat) te tan Smartphone, HSSLC Distinction a pass zirlai 2(pahnih) te tan Laptop hlanna hun hman a ni a. Hemi rual hian First Division a pass, chhungkaw harsa, Lengteng bial huam chhunga Zirlai 23 leh SRDC Area huam chhunga Zirlai 22 te tanpuina tangka fai hlanna  hun hman nghal a ni a, he hunah hian Prof. H. Lalthanzara, Principal, Pachhunga University College chu khuallian a ni.

He huna khuallian Prof. H. Lalthanzara chuan zirlaite chu Board leh University mark te hi pawimawh viau mahse tunlaiah chuan an thluaka thiamna zawk kha a pawimawh telh telh tawh a ni tiin college-a thawk tur laknaah pawh mark aiin an thiamna neih enge tih interview naah kan lo en thin a ni tiin zirlaite chu a nuam lam(comfort zone) kal san a, rim taka Pathian tih chunga zir tur a chahin beidawng duh lo te hi mi hlawhtling an ni thin a ni a ti bawk.

Lengteng bialtu MLA leh SRDC Chairman Dr L.Thangmawia pawhin thusawiin zirlai lawmpuina dawngte leh tanpuina dawngte a lawmpui thu a sawi a, a bial chhunga zirlaite ten zirna kawnga inelna thianghlim an neih beisei naa Smartphone leh Laptop Distinction a pass chin te pek thin an nih thin thu te, zirlai thiamthei chhungkaw harsa te khaichhuah nana tanpuina – admission fee, Uniform leh lehkhabu man daih tur a ngaih tanpuina  pek thin an nih thu a sawi a. Hei hi inthlan dawn kuma tih tan ni lovin kum 2019 atanga tih tan a nih tawh thu leh heng zirlai tanpuina dawng tur hi Ngopa BDO Chairman-na hnuaiah party induhsakna awm lo va committee-in a thlan thin thu a sawi.

Dr. Thangmawia chuan kumin 2023 MLA thlan lo awm turah Lengteng biala ding turin kan hotute duhsakna ka dawng leh ta a, Pathian leh Lengteng bial mipuite zarah thlan tlin leh ka nih chuan zirlaite tana tuna kan tih mek belhchhahin, Lengteng bial chhung zirna in atanga ti tha te Delhi leh India ram hmun remchangah STUDY TOUR ka kal tir dawn a, zirlai an mahni class-a pakhatna hauh pha te chu tel sa an ni dawn a ni a ti.

Dr. L.Thangmawia chuan zirlai te chu Mizo hnam tana chhenfakawm khawpa hnam thinlung pu chunga rim taka an zirlaite zir turin a chah a, Zofate zingah khawvel huap pawha Scientist hmingthang tam tak kan neih a tul tawh tak zet a ni a ti a, Social media hmang fimkhur tura chahin tunlaiah thalaite rilru hruaikawi tura thu belh chian dawl lo Social media-a thehdarh a tam thu leh politics-a inbeihna mai piah lamah kohhran leh NGO te thlenga thu dik tawk lo hmanga beihna a tam thu sawiin hengte hi thalai ten thu dik leh dik lo fimkhur taka thliar a, a dik ngei tih chian hma chuan comment pawh pek fimkhur a ngaih thu te, uchuak taka comment pe lo tura insum tur leh thu rintlak a nih leh nih loh fiah hmasa zel tur leh Social media a nih avanga duh duh sawi theihna emaw ti ngawt lo va, kan mizo hnam nun leh zia rang kalha heng thil te hi hmang lo turin a chah bawk.
He hunah hian Lengteng bial Zirlai 23 te tan  Lengteng bial MLA Fund atangin ₹ 3,45,000 leh SRDC Area Zirlai 22 te tan SRDC Fund atangin  ₹ 3,14,000 sem ral niin he hun hi Dr Zoramdinthara, Associate Professor, Mizoram University in a kaihruai a, Pu Lalzamliana Thangluah, Head Assistant SRDC in hunserh hmangin Pu F.Lalnunmawia, Consultant, SRDC in lawmthu sawiin hun a khar a ni.