3415/2022-2023

Aizawl 31st January 2023: Vawiin zing dar 7:30AM khan Hlunsanga Malsawmna Scheme, Lengteng bial chhunga rangva in la nei lo te neih tir vekna tur scheme chu Kawlkulh a Pu Hlunsanga(L) in ah Lengteng bialtu MLA Dr. L.Thangmawia'n a hawng a, he scheme bul tan nan Minister zahawm tak Pu Lalruatkima'n rangva thahnem tak a ruahman sak thu a puang nghal bawk.

Dr. Thangmawia chuan Sawrkarin UT hun lai atangin khawsak harsa zawkte tan scheme tam tak duangin hma tam tak lak a ni tawh thin a. Mahse tun thlengin in dinglai, rangva in la nei lo a la awm nual a, chung bikte chu Phase I ah dah an ni a. MLA in a ngen anga BDO Ngopa leh BDO Khawzawl ten survey an neihah Lengteng bialchhungah in ding lai 28 chu rangva in chung la nei lo an ni a, he survey a telh hmaih rangva inchung la nei lo te pawh telh belh zel an ni dawn a, hengte hi party lam thliar lovin hmalak nghal a ni dawn a, kumin 2023 chhung ngei phase I hi zawh hman tum a ni ang a, he scheme in a huam tel tho rangva inchung tuiek thlak hna pawh he mi dawtah kalpui tur a ni a ti a, chutih laiin heng in te hi rangva chung khuh tur hian kaihhnawih dang tam tak a awm a, chuvangin he scheme hlawh tlin nan Khawtlang hruaitute leh NGO, a bik takin YMA te puihna a ngai dawn a, an puihna pawh ka ngen a, Lengteng bial mipuite nen kan tan ho chuan he scheme hi a hlawhtling ngei ang, a ti bawk.

Dr. Thangmawia chuan hnam tin hian an hnam zalenna atana beitu(Freedom Fighter) te an ngai hluin an chawimawi fo thin a. Mahse khawvel History ah hian zalenna sual hlawhtling hi an tlem fe zawk a. Kan ram India ngei pawhin hun rei tak sual mahse, tharum chuan British sawrkar kha a hneh lo a ni, a ti a. Zofate pawhin independence kan sual mai ni lovin independence kan puang a, chu independence puannaa hming sign tu te zinga mi, Pu Hlunsanga(L), a ma insak la ding ngei a hun kan hmang thei hi a lawmawm tak zet a ni a ti bawk.

He scheme hnuaia a hmasa ber atan Pi Vanrampani, Dinthar veng, Kawlkulh leh Pu Lalrova, Mel veng, Kawlkulh te inchung chu Kawlkulh VC te kaihhruaina hnuaiah rangvaa thlak turin tihfel nghal a ni a, a tah tawlin survey a tarlan te inchung rangvaa thlak chhoh zel a ni ang a, kumin 2023 chhung hian rangva inchung la nei lo zawng zawngte rangva khuhsak hman tum a ni a, he scheme hi kum thum chhung 2023 atanga 2025 thleng kalpui tura ruahman a ni.

He inkhawm hi Pu Lalduailova Sailo, President, Joint VC, Kawlkulhin a kaihruai a, Kawlkulh North MUP President Pu K.Lalrenga'n hunserh a hmang a, Pu C.Hualhnuna, Ex VCP, Kawlkulh chuan Pu Hlunsanga(L) chanchin a sawi bawk a. Kawlkulh VC, Kawlkulh North VC, Kawlkulh Group YMA, Branch YMA, MHIP leh MUP hruaitute pawh he programme ah hian an tel a ni.

Attachment

  • Loading attachment...