3414/2022-2023
Kolasib dated 30th January 2023: Vawiin chawhnu khan DC Conference Hall, Kolasibah kangmei chhuak tur venna kawng a hmalakna, 'Fire Prevention Week 2023' hman dan tur relin District Fire Prevention Committee chuan thutkhawmna an nei a. Fire Prevention Week chu ni 6 atanga ni 10 February, 2023 chhung hman tur a rel niin a hawnna hun hi Parish Hall ah neih a ni dawn a ni.

Pu John LT Sanga, Deputy Commissioner chuan thutkhawmna hun kaihruaiin ram leilung huasakna chereu tur ven hna chu mi tin mawhphurhna a nih thu sawiin khaw ro lai a nih chhoh dawn avangin ram, in kang leh kangmei avanga nunna channa a thlen loh nan fimkhur a tul hle thu a sawi. Kangmei thleng tur venna kawngah sawrkar leh tlawmngai pawl hrang hrang thawhho a pawimawh thu Pu John LT Sanga chuan sawiin faina kawng ahte, ram kang tur ven kawng ahte, khawtlang nuam siam kawng ahte District dangte entawntlak khawp a hmalakna tha kalpui turin kalkhawmte a chah.

Pi Margaret Lalramchhani, DFO tarlan danin kum 2022 chhung khan Kolasib district chhung ah tum 300 kangmei chhuak ang a chhinchhiah a ni a, 464.99 Hectare a zau a ni. Heng zing a hmun 288 chu lo, leipui leh huan halna a ni a, hmun 12 chu Reserved Forest chhung a kangmei chhuak a ni.

Thutkhawmnaah hian lo hal hun chu Mizoram chhung a district dangte angin March ni 15 thleng bituk ni se ti a rel a ni a, inthlahdah vang a kangmei tichhuak te chung ah dan ang a hremna pek ngei ni se tih rel a ni bawk. Lo hal hun chhung hian kawngpui an a ram neite chuan Roadside Reserved a thingphun an tihchhiat loh nan DFO, PWD leh LAD a thawktuten ruahmanna siampui tur a rel a ni a. Ram hal hma in an awmna Village Council hruaitute hriattir hmasak thin tur a ni bawk.

Kolasib district chhung ah kum 2022 chhung khan kangmei ven kawng a khua titha ber ah Vengthar Village Council-te thlan an ni a, Bairabi North in pahnihna la in Tumpui Village Council-ten lawmman pathumna an la bawk a ni.