3413/2022-2023
Champhai, the 30th January, 2023: Vawiin chawhnu dar 2 khan Champhai DC Conference Hall-ah February ni 1-2, 2023 chhunga zan khat riaka Champhai rawn tlawh tur, Mizoram Governor Dr Hari Babu Kambhampati lo dawn sawn dan tur leh a cham chhunga tul hrang hrangte bawhzui dan tur chungchanga inbuatsaihna leh hmabak awmte Bawrhsap Pu James Lalrinchhana hova rel a ni.

Pu James Lalrinchhana chuan Mizoram Governor-in Champhai a rawn tlawh huna tul angte buaipui turin inpuahchahna kalpui mek zel a nih thu sawiin, Line Department leh Bank hotute chu felfai taka ruahmanna kalpui a nih theih nana theihtawp chhuah theuh turin a chah a ni.

He hunah hian SDO Sadar Pu H.Lalhruaitluanga'n program neih dan tura ruahmanna siamte a sawifiah hnuah SP Pu Lalrinpuia Varte hnen atangin security arrangement, traffic management leh control room chungchanga ruahmanna neih dante ngaihthlak a ni bawk.

Thutkhawmah hian zan khat riaka Champhai rawn tlawh tur Mizoram Governor, Dr. Hari Babu Kambhampati chu Champhai a cham chhunga hun tha leh hlawkthlak tak a hman theih nana ruahmanna siam nise tih a ni a. Sawrkar Department hotute leh Banker-te pawh mahni Department leh Bank enkawl theuh kaltlanga hmalakna langsar leh hlawhtlinna hmuhte chhawpchhuak thei tura inruahman theuh tura chah an ni bawk.

Ruahman dan chuan Governor hian a cham chhungin Sawrkar Department hotute, Banker, NGO, Political Party leh Sakhaw hruaitute kawmna hun a neih dawn bakah Tlangsam Winery, Champhai tlawhin Grape chingtute kawmna hun a hmang dawn a. PMAY (Urban), PMAY (Rural) leh PMUY (Ujjwala) hamthatna dawngtute tlawhin a kawm dawn bawk a. Heng bakah hian Zokhawthar tlawhin Assam Rifles Office leh Customs Office-te a tlawh dawn bawk a; he huna tel tur leh a tlawh turte pawh hrilhhriat fel an ni tawh a ni. Champhai District a tlawh hnu hian Khawzawl District a tlawh nghal dawn bawk a ni.