3412/2022-2023
Dated Serchhip, the 30th January, 2023: Vawiin khan National Defence College, Ministry of Defence, New Delhi a National Security & Strategic Course zir mek India sipai officer te leh India ram thian tha ram dang paruk atanga sipai officer kal khawm; an vaiin mi 18 ten Thenzawl an rawn tlawh a. Anmahni lawmna leh inkawm hona Thenzawl Golf Course Conference Hall ah buatsaih a ni.

Inkawm honaah hian Pi V. Lalmuanpuii, SDO, Thenzawl chuan mikhualte lawmna thusawiin, Pu Lalmuansanga Ralte, Addl. DC Serchhipin Serchhip dinhmun tlangpui hrilhhriatna a nei a, Pu Stephen Lalrinawma, SP, Serchhipin Serchhip district Security dinhmun tlangpui sawina neiin, Pu H. L Thangzuala, Principal, PTS, Dr. Shri Dhar, Principal, Horticulture College, Lalbiakchama Chawngthu, DFO, Thenzawl leh Dr. Lalmuanpuia Samte, AH & Vety te pawhin an hmalakna tlangpui sawina an nei bawk a, chumi hnuah inkawm khawmna buatsaih zui a ni.

He hunah hian Maj. General Hari B. Pillai chuan, National Defence College chu kum 1960 a din tan niin vawiina he Course zir mekte hi a Course vawi 63 na batch an ni a. National Security and Strategy Course zir tur hian India sipai, Army, Navy leh Air Force atangte leh India thian tha Foreign ram sipai, Colonel leh a chunglam chinte thlan thin an ni. Heng kan zirlaite hi India ram chhung fan pui changte, a changin Foreign ramah te pawh kan zinpui thin. Tunah hian he Course zir mekte hi Team pasarih ah inthendarhin India ram hmun hrang hrang kan fang mek a, India rama hnam hrang hrangte nunphung leh hnamziate zira, mipui nunphung hre tura rawn zin kan ni, a ti a. Thenzawla an lo dawnsawn danah lawmthu sawiin, Mizoram nuam an tih thu a sawi a ni.

National Security & Strategic zir mek ram dang Sipai Officer te hi France, Japan, Banglades, Bhutan, Uzbekistan leh Oman atanga rawn kalte an ni a. Anni ho leh India ram sipai officer te hi Major General Hari B. Pillai, Senior Directing Staff (Army -III), Faculty, National Defence College, hovin an rawn kal a. Zaninah Thenzawlah an riak dawn a ni.

Inkawm honaah hian Serchhip District a Officer sawm bik engemawzat leh khawtlang hruaitute an tel a ni.