3086/2022-2023

Aizawl 16th December 2022: Tunkar chhung khan Lengteng bialtu MLA Dr. L.Thangmawia chuan a bialchhunga hmasawnna hnathawh hrang hrangte a hmunah a tlawh a.

Ni 14.12.2022 Nilaini khan Ngopa leh Lamzawl inkar Tuithil leh Tuiphal kama Horticulture Department hmalak mekna, Green House bunna tur hmun a tlawh a. MLA hi DHO, Saitual Pu C.Lalawmpuia, North Eastern Farmers' Union(NEFU), Ngopa hruaitute leh kuthnathawktuten an tawiawm a ni.

He hunah hian Dr Thangmawia chuan "Ka ngen na te ngai pawimawh in kan CM zahawm tak Pu Zoramthanga leh Horticulture dept hotuten ka bial Tuithil leh Tuiphal phai ah Green house 50 vel lai min bun thar sak tur hi kuthnathawk tu te tana hmasawn ropui tak niin ka hria a hei bak ah pawh hian helai hmun hi JICA project (Japan mithiam te project rawn siam) hmalakna hmasa atana thlan a ni te hi a lawmawm hle a, helai hmun a kuthnathawk tu Ngopa leh Lamzawl a mite hi thlasik thlai chin lamah nasa taka hma la leh Dawnfawh ching hlawhtling hmasa an niin Sawrkar tan pawh hmalak pui tlak a taima leh hlawhtling an ni a, an hlawhtlin theih nana sûlsutu North Eastern Farmers Union (NEFU) Ngopa te pawh an fakawm hle a ni" a ti a

"Heng Green house 50 vel lai hi Horticulture department mithiam te nen uluk taka enkawl a nihchuan kum 2024 a KTP General Conference, Ngopa a kan thlen hun ah pawh hmun hran a mi nilo ka bial chhung ngei atanga thlai thar tuihnai leh tharlam tak, khawmpui palai te kan lo hlui theih ngei ka beisei a ni" a ti bawk.

MLA chuan kut hnathawktu taima tak tak a bialchhunga an awm chu lawmawm a tih thu a sawi a, "Zoram mipuite pawh sate dang leh ram dang thar aia Mizoram kuthnathawktite tharchhuah ngei lei zel turin ka ngen a ni" a ti bawk.

Vawiin ni 16.12.2022 hian Mimbung to Tuivai inkar kawng laih zauh hna thawh mek a tlawh a. Hnathawktute chu fur hma ngei a hna thawk zo tura ngenin he kawng pawimawh tak laih zauh hna chu tha taka thawk turin a chah bawk. MLA hi SDO(Civil) Ngopa Pu Vanlaltanpuia, SRDC Development Officer Pu Remlalliana Hnamte leh PWD SDO Ngopa Pu Lalrozama ten an tawiawm a ni.