3085/2022-2023

Aizawl 16th December 2022: Vawiin khan 39th Higher Secondary School Games 2022 chu Leisekawt Field, Serchhipah khar a ni. Kharna inkhawmah hian Dr. Lalzirmawia Chhangte, Secretary, School Eduation chu khuallian a ni a, Dr. H, Lalthlangliana, Director of School Education chu khual zahawm niin he hun hi an hmanpui a ni.

Director chuan thusawiin, Secondary sports zawhah Board exam kan hmachhawn leh mai dawn a, thawh huna kan thawh a, infiam huna kan infiam a, zir huna lehkha tih tak zeta kan zir a ngai dawn a ni a ti a. Teirei peih zirlai kan nih a, zirlaiah hlawhtlinna kan chan theuh theih nan zirlaite duhsakna a hlan a ni.

School Education Secretary chuan hripui leng vangin school games hun rei tak kan neih theih tawhloh hnuah, secondary school games tluang tak leh hlawhtling taka kan nei thei hi lawmawm a tih thu a sawi a. Infiamna hi mihring inchherna (personality building) atana thil tangkai tak a ni a, life skills min zirtiru tha tak a ni. NEP 2020 chuan Tawnhriat hmanga zirna (Experiential Learning) huang chhungah khungin, Zirna leh sports inbelhbawm (Sports integration) hi subject curriculum hrang hranga zirtina hmanruaa hman turin a sawi a, zirna leh sports belhbawmin, sports hmang a naupangte theihna hrang hrang hai chhuah leh, naupangte nunphunga bet tura hmalak tum a ni dawn a. Tun ai nasa zawkin ‘Fit India’ hnuaiah uar zawk a kalpui a ni tawh dawn a ni a ti a ni.

Mizoram Secondary School Games-ah hian District 12 awmin, Aizawl District chu Aizawl North leh South-ah then a ni a, District hrang hrangte atangin zirlai leh zirtirtu 696 an tel thei a ni. Infiamna discipline 6- Athletics, Badminton, Football, Table Tennis leh Volleyball hmangtein inelna kalpui a ni. Saitual District chu Overall Champion niin, Gold 4, Silver 3 leh Bronze 2, avaiin Medal 7 an la a ni.

Best Athlete(Girls) chu Ethel Lalpekhlui, Govt. N.E. Khawdungsei H/S Saitual District-in lain, Gold 2 leh Silver 2 a la a, Saitual District chu Athletic Girls-ah Team Champion an ni. Best Athlete (Boys) chu ZD Lalhunruata, Govt. G.M H/S, Champhai District-in lain, Gold 1 leh Silver 1 a la a, Champhai District chu Athletics Boys category-ah Team Champion an ni. Badminton (Boys Team)-ah Serchhip District an champion a, Badminton (Girls Team)-ah Aizawl District South an champion bawk. Football-ah Kolasib District an champion a, Volleyball-ah Khawzawl District an champion bawk. Table Tennis Girls Team-ah Kolasib District an Champion a, Table Tennis Boys Team-ah Aizawl District South an Champion bawk. Open Table Tennis Single Boys-ah Hnahthial District an Champion a, Open Table Tennis Single Girls-ah Aizawl Distict South an Champion bawk a ni.

Vawiin 39th Mizoram Secondary School Games kharna hun hi Directorate of School Education Jt. Director, Pu Zohmingthanga’n a kaihruai a, Physical Education Officer Pu H.Sanglura’n report tawi pein, School Education Department-a officer-te, Headmasters, Zirtirtute leh zirlaite an kalkhawm a ni.