3084/2022-2023

Aizawl 16th December 2022: Vawiin khan School Education Minister Pu Lalchhandama Ralte chuan Ținghmun Middle School Golden Jubilee lawmna Govt. Middle School Ținghmun-a neih chu khuallian niin a hmanpui.

School Education Minister chuan he Jubilee lawmnaah hian thusawiin ram hmasawn ni tur chuan  a țobul mihring chherna pawimawh ber chu zirna hi a ni a ti. Mihring tihhmasawn hmasak hi a pawimawh êm avangin  sorkar pawhin a ngai pawimawh a ni a ti a. Sorkarin sikul building a sak thar leh repair te, zirtirtu a dah belh dan te a sawi.  Ram siamțhatna hnukpui ber anih avangin  zirnain hmun sang a channaah hmasawnna tluantling a awm țhin a ni a ti bawk.

Minister chuan hmar tlangdung chu kawngpui pawimawhin a paltlang thuai dawn a ni a ti a. He tlangdung ațanga Bagha panna tur chu NH 306 tia vuah fel a ni tawh a, Manipur panna kawngpui lian tham tak sialna tur sum vbch 1500 chu Union Transport Minister Nitin Gadkari a'n a puang tawh a, hmar tlangdung hi Manipur leh Bagha panna tlangdung a ni thuai dawn a, heng kawngpui te hi hmasawnna hnuk an ni dawn a ti bawk.

Minister chuan zirtirtute chu missionary thinlung pua hmangaihna tak tak nena thawk turin a sawm a, zirlaibu piah lamah tualzal nun pawh zir tlak nun nei turin a sawm. Minister chuan zirlaite pawh nih tum leh thlen chin tur target neia zir turin a fuih a, tunlai khawvelah hlawhtling tur chuan tum ruh leh  teirei peih nih a ngai tawh a ni a ti bawk. Zirlaite chu Pathian hre chunga lehkha zir tur leh ruihhlo laka inthiarfihlim turin a sawm bawk. Minister hian Jubilee lungphun a hawng a, souvenir a tlangzarh bawk.

Pu Lalmalsawma Darngawn Chairman Sinlung Hills Council pawhin thu a sawi a, Ținghmun MS kalkawng leh hma a sawn zel dan a sawi a,   lawmawm a tih thu a sawi a ni.

Ținghmun Middle School Golden Jubilee lawmnaah hian zirlaiten Jubilee hla an sa a, Jubilee Psalm leh malzai te ngaihthlak a ni a,  Sinlung Hills Council Chief Executive Member  leh Executive Member te,  he school-a lo thawk tawh te, zir chhuak tawh te, tuna zirlai leh zirtirtute, khawtlang hruaitute leh khawtlang mipui an kalkhawm a ni