1689/2022-2023
Aizawl 24th August 2022: Lengteng bialtu MLA Pu L.Thangmawia chuan Kawlkulh bypass road laih mek te, Kawlkulh PHC X-Ray khawl thar bun te, Kawlkulh Field No 2 tur laih mek te, MLA Fund hmanga Kawlkulh Town Hall a Babminton Court Carpet phah dan turte en in Kawlkulh MHIP Building sak mek a tlawh a. DBL company hnena CSR fund a dil sak Rs 6 lakhs hmanga Puilo khuaa Health Clinic Centre sak mek a tlawh bawk.

Lengteng bialtu MLA chuan Chief Minister Pu Zoramthangan Kawlkulh bypass road laihna tur sum a ruahmansak chu lawmawm a tih thu sawiin tun thal chhunga a tam thei ang ber hnathawh a nih theihnan mipuiten hnathawktute lo tawiawm turin a ngen a. Compensation tur sum a awm loh laia mahni hmun leh hma, vantlang tana phal taka petute chungah thinlung takin lawmthu a sawi bawk.

Pu Thangmawia chuan Hripui leng karah thalaite tan MNF sawrkar chuan chawl lovin a theih ang angin hma a la reng tih sawiin; Sports discipline hrang hrang, Lengteng bial thalaite tuipui ho chu ngaihven a, tih hmasawn mek zel a nih thu leh hmalak chhunzawm zel a nih tur thu sawiin "infiamna hi kan ram thalaite run mektu RUIHHLO do na hmanraw tangkai taka kan hman a pawimawh a ni" a ti. A bialchhunga Health Sub Centre la awmlohna khaw pa li, Vankal, Puilo, Changzawl leh Hrianghmunte Mizoram sawrkar Health Department-in Health Clinic Centre a dah thar sak vek a vangin lawmthu a sawi a, heng zinga Khaw pahnih Hrianghmun leh Changzawlah te Health Clinic Centre Building MLA fund leh fund dang hmanga sak zawh tawh a nih thu leh Puilo leh Vankal a building sak hna kalpui mek pawh kumin 2022 chhung ngeia zawh hman tum a nih thu a sawi.

Anusha Project Pvt. Ltd.(APPL) ten a ngenna ngai pawimawh a CSR Fund atanga X-Ray khawl changkang tak, Kawlkulh PHC tana an lei sak, tuna hman theih tura peih a lo ni ta chu lawmawm a tih thu sawiin a hmang tangkai tur Kawlkulh leh a chhehvel mipuite a lawmpui thu a sawi bawk.

MLA hian Dulte khua tlawhin Dulte Hall sak nan Rs 418 lakhs Central ah dil mek a nih thu sawiin hei hi a lo hlawhtling thei a nih chuan khawdang te pawhin he Hall sak dan kalhmang an entawn laih laih tlak tura abik taka ruahman a nih thu sawiin Dulte YMA hnenah Oxygen Concentrator a pe bawk a ni.