2533/2022-2023
Aizawl the 3rd November 2022 : Vawiin ni 03.11.2022 hian Lengteng bialtu MLA chuan YMA, Kawlkulh Branch-in Diamond Jubilee an lawm ni khatna chu khuallian niin a hmanpui a, a bialchhunga hmasawnna hnathawh thenkhat a tlawh kual nghal bawk.

YMA Diamond Jubilee lawmna ah hian Khuallian Pu L.Thangmawia chuan thusawina hun neiin Kawlkulh khawtlang mipuite Jubilee chibai bukin, Kawlkulh khawtlang tana thahnemngai taka lo thawk tawh thintu zawng zawngte Jubilee pual hian zahna chibai a buk thu te sawiin YMA chu pi leh pi hun atanga tlawmngai pawl, chhiat ni that ni ah pawh khawtlang innghahna a nih thu a sawi a. YMA chu pawl thianghlim leh tun thlenga NGO lian ber, hnamdangte pawhin an hriat lar a nih thu a sawi bawk. Covid hripui avanga MLA a nih kum li chhunga hnathawhna hun kum khat awrh chauh a awm thu leh chumi avanga bial mipuite beiseina a phak lohnaah ngaihdam a dil a. YMA-te'n hun kal ta a tha taka an thawhpui anga hun lo kal leh turah pawh thawhpui chhunzawm zel turin a ngen bawk.

Pu L.Thangmawia chuan a bial chhunga hmasawnna hnathawh hrang hrangte vawiin vek hian a fang kual nghal bawk a. Kawlkulh by-pass road laih mek tlawhin hnathawktute chu a kawnglaih zauh hna chu December, 2022 ral hmaa zo hman tur leh fur lo thlen leh hmaa blacktop zawh hman hram tum turin a chah a. Puilo khua a Health Clinic Centre sak mek chu tlawhin sak zawh a nih veleh Health Worker leh Helper dah nghal a nih tur thu a hrilh a ni.

Pu L.Thangmawia hian NHIDCL hnuaia Champhai Road lai mektu DBL Company hotute chu an camp-ah tlawhin Kawlkulh Field No 2 laih hna tan leh thuai turte, Pu Aichhinga Road(Puilo to Tuichang) in National Highway a pawhna siam tha leh thuai turte leh CSR atanga Puilo Health Clinic Centre sakna tur Rs. 6 lakhs an pek tur tifel thuai turin a ngen nghal bawk. DBL Project Manager Pu Simanta Sharma chuan an hnathawk Diwali chawlh hmang mekte rawn thlen veleh an lo bawhzui nghal tur thu leh CSR Fund pawh ni 15 chhunga an pek fel tur thu a lo hrilh a ni.

He hun hi Kawlkulh Town Hall-ah neih niin Pu K. Lalthazuala, Finance Secretary, Kawlkulh YMA Branch chuan kaihruaiin thusawi hrang hrang ngaihthlak a nih hnu-ah programme hlimawm tak hman a ni.