No.3278/2021-2022
Aizawl, 4th December, 2021 : A bial chhunga hmasawnna hnathawh mekte tlawh kuala hun hmang Pu L.Thangmawia, MLA chuan nimin zing khan Kawlkulh damdawiin (PHC) a tlawh a. Kawlkulh damdawiin atana X-Ray Epsilon EP Corsa (15KW 300mA) Rs 5,90,000 man leh a result print-na khawl FCP PRIMA Image Reader Rs 6,50,000 man, MLA-in kumin May thlaa a dil, Corporate Social Responsibility (CSR) atanga tuna NH-6 kawngpui lai mek tu, Anusha Projects(P) Ltd. in an leisak, tuna Kawlkulh damdawiin a phurh thlen tawh chu a dinhmun a enfiah a. MLA hi damdawiina thawktute leh Mizoram State Cancer Institute atanga X-Ray lam mi thiam, Radiological Safety Officer ten lo dawngsawngin, He X-Ray khawl hi a chhuak thar ber chi a nih thu leh ZMC leh Aizawl Civil Hospital-a an hman ang chi a nih thu te, a chhuak hlui ho aia a result a fiah that zawk thu te lo hrilh in tuna Kawlkulh damdawiina X-Ray room hi a chhuak hlui ang chi dahna tura duan a nih avangin Dark room te a la awm a, heng hi khawl tharah hian a tul tawh dawn loh avangin thiah a ngai dawn a. Heng room siamthat hnate hi zawh a nih veleh Company Engineer te chah chho vin khawl hi bunfel tur a ni ang a. Chu mi hnuah X-Ray khawl dah phalna Atomic Energy Regulatory Board(AERB) ah tih fel a la ngai dawn bawk a ni.
MLA chuan mipui mamawhna hria a X-Ray khawl changkang tak pe tu Anusha Project(P) Ltd hotute hnenah lawmthu sawiin a tul anga chak taka hmalak saktu Mizoram State Cancer Institute chungah lawm thu a sawi a, he X-Ray khawl hi hman theiha peih a nih thuai theihnana chak taka hmalak chhunzawm sakturin a ngen nghal bawk.
MLA hian Kawlkulh khawtlangin Helipad atana hmunhma an ruahman chu tlawhin Aviation Principal Consultant Wng Cmdr J.Lalhmingliana chu a biaksak nghal a, remchang hmasa berah a hmunhma hi department lamin an enfiah sak tur thu Principal Consultant hian a lo hrilh a ni.
Pu L. Thangmawia hian niminpiah (2.12.2021) khan MLA Fund Rs 2,00,000 hmanga laih mek Vanchengpui-a Sente Zau Agriculture link road a tlawh bawk a. Vanchengpui khuaa kuthnathawktute chuan an mamawh em em link road laihna tur a siamsak avanga an lawmthu MLA hi an lo hrilh a ni.
MLA hian a bialchhunga PMGSY sum hmanga kawng siam mek Changzawl kawng leh Vankal kawng te tlawh bawkin sawrkar laipuiin kum 2022 March thla hmaa PMGSY scheme hnuaia kawnglaih te zawh fel vek tur a tih ang ngei a zawh fel hman tum turin thawktute a chah bawk.
20 Megawatt kawlphetha pechhuak thei tur Vankal Solar Park hna thawh mek pawh MLA hian a tlawh a. MLA hi Khawzawl Power Division EE Er K.Duhsanga leh SDO Er Lalhmingthanga ten an lo dawngsawng a. P & E hotute hian tun hmaa Khawzawl atanga Kawlkulh area tana power lak thin chu Vankal Solar Park atang lak a nih tawh dawn thu te, hei hian Khawzawl leh Kawlkulh inkar line hlui tawh tak avanga Kawlkulh leh a chhehvelin power an neih that loh thin a tih ziaawm an beisei thu te, harsatna dang a awm loh chuan kum thar 2022 hian Vankal Solar Park hna hi zawh an in beisei thu te an lo hrilh a. MLA chuan P & E department-in Vankal Solar Park a hlawhtlin theihnana rim taka an thawh thin dan a taka a hmuh thin thu leh an inpeknaah lawmawm a tih thu a sawi a. Mizoram mipui tam zawkin an tangkaipui tur Project lian tak atana an ram tha lai tak ui lova petu Vankal khawtlang chungah pawh lawmthu sawiin, Solar Park atana ram petu khua Vankal khaw mi leh sate chu an thawh theih ang chi ah lo duhsak zel turin Department hotute a ngen nghal bawk a ni.
Attachment
- Loading attachment...
