No.179/2021-2022

Dated Khawzawl, the 18th April, 2021: Khawzawl District Disaster Management Authority (KDDMA) hnuaia Quick Response Team (QRT) member-te chuan Lengteng Wildlife Sanctuary leh Mawmrang tlangah nihnih chhung awh Alpine Style Search and Rescue training April 16-17, 2021 khan neiin, intuaitharna hun an hmang a ni.

Training hi Pu Zothanmawia, Deputy Commissioner, Khawzawl DDMA Chairman leh Pu H. Lalramenga, SDC (DM&R) ten an telpui a. Pu Moses Lalthanpuia, State Adventure Organizer, SYS department-in QRT member-te hi ramhnuai leh khawchhunga chhiatrupna thleng thei hrang hrang hmachhawn dan tur, a bikin mi zawn leh chhanchhuah (Search and Rescue) hna thawh dan chungchangah training tangkai leh hlawkthlak tak a pe a ni.

Khawzawl DDMA hnuaiah hian QRT member pariat (8) an awm mek a. Chhiatrupna leh rikrum thila chechhuak hmasa first responder ni thei tur leh, mipui vantlang hnena zirtirna pe chhawng thei turin training buatsaihsak thin an ni a. QRT te hian Khawzawl District huamchhung Village Council leh YMA aiawhte hnenah Community-based Search and Rescue training an lo pe tawha, mipui vantlang hnena training pe turin hmachhawp engemawzat an nei mek bawk a ni.