1222/2024-2025
Aizawl, the 19th July 2024 : Labour, Employment, Skill Development & Entrepreneurship changtu Minister Pu Lalnghinglova Hmar chuan vawiin khan New Delhi-ah Sawrkar laipui Minister of Skill Development & Entrepreneurship Pu Jayant Chaudhary chu a pisa-ah kawmin Mizorama skill development hmasawnna tur kawng hrang hrangte a sawipui.
Pu Lalnghinglova Hmar chuan Ministry of Skill Development & Entrepreneurship-in Pradhan Mantri Kaushal Vikas Yojana (PMKVY) 4.0 hnuaia Mizoram puala Special Project an pek leh kumin March thlaa hemi atana sum an ruahman fel avangin lawmthu a hrilh a. Ministry hnuaia skill hnathawh theih hrang hrang chu Mizoram nena inmil lo a tam thu Central Minister hi hrilhin Mizorama hnathawh leh skill chhawr theih mila skill hmasawnna tur duansak turin a ngen a. Mizoram mai nilo hmarchhak pum huapa skill chungchang inrawnkhawmna neih nise tiin Pu Lalnghinglova Hmar chuan a rawt a, hemi chungchang hi Minister pahnihte chuan sawidunin, kumin October thla velah ruahman nise tiin thu an dah a, Mizoram zin tura Central Minister a sawmna chu Pu Jayant Chaudhury chuan tihhlawhtlin a tiam a ni.
Pu Lalnghinglova Hmar chuan India Skills inelnaa Mizo thalai tithate chungchang pawh sawi zauin report a pe a. Central Minister chuan Mizo thalaite’n theihna an neih chu tun aia sang zawk thlen tir a tum thu leh a  duh thu a hrilh a;  hemi atan hian Sawrkar laipui chu a inhawn reng thu Pu Lalnghinglova Hmar hi a hrilh a ni.
Ministry of Skill Development & Entrepreneurship chuan PMKVY 4.0 hnuaia Mizoram State Special Project atan March ni 1, 2024 khan cheng vaibelchhe 31.06 an rawn ruahman a. He project kaltlang hian thalai 10000 chuangte chu skill training pek tum a ni.

Attachment

  • Loading attachment...