1221/2024-2025
Aizawl, the 19th July, 2024: International Fund for Agricultural Development (IFAD) bultum Fostering Climate Resilient Upland Farming Systems in the North East (FOCUS), Mizoram kaltlanga buatsaih, thlai thartu leh leitute indawrtawnna 'IFAD-FOCUS Mizoram Buyer Seller Meet 2024', ni hnih (July ni 19-20) chhung awh tur Millennium Centre Exhibition Hall, Rooftop-a buatsaih chu vawiin chawhma dar 10:30 khan Agriculture and Farmers Welfare Minister Pu PC Vanlalruata chuan khuallian niin a hawng. He hun hi loneitute'n an thlai thar chhuah leh sawngbawlte awlsam zawka an hralhchhuah theih nana buatsaih a ni.
Khuallian Pu PC Vanlalruata chuan IFAD-FOCUS Mizoram bultuma Mizoram hmun hrang hranga kuthnathawktute thlai thar chhuah leh sawngbawlte zawrchhuahna remchang buatsaih a ni chu lawmawm a tih thu sawiin, hei hian hmasawnna a entir mai bakah chona thar siamin dinhmun tha zawk min thlen ngei ka beisei a ni, a ti a. Ram sum leh pai dinhmun siamthat nana pawimawh ber leh mipui tam zawkte eizawnna Agriculture sector chawikan kawngah kan zavaia tanrual a ngai a, hemi hi kan puitlin theih phawt chuan kan ramah Agriculture-in nasa takin hma a sawn thei dawn a ni, a ti a. Agriculture and Farmers Welfare Minister chuan kuthnathawktute dinhmun leh harsatna an tawhte hriat tlan a pawimawh thu sawiin, anmahni atangin thar chhuah awm ringawt mah se, a hralhna market lamin a umzui si loh chuan hmasawnna tluantling a awm thei dawn lo a ni, a ti a. Market-in hma a hruai loh chuan harsatna tam tak kan tawk thei tih sawiin, kuthnathawktute leh market awmze nei taka kan thlunzawm theih hunah hma kan sawn thei dawn chauh a ni, a ti bawk. 
Pu PC Vanlalruata chuan sawrkarin agriculture marketing a ngaihpawimawh em avangin Agricultural Market Assurance Fund Management Fund Board (AMAFMB) a din a, tum sarih zet meeting neih kan nei tawh a, theihtawpin hma kan la mek a ni, a ti a. Agriculture marketing tihchangtlun kawnga thawhpui turin farmer-te, entrepreneur leh FPO te sawmin, kuthnathawktute tharchhuah hralhna tura hmalakna hi rawngbawlna pawimawh leh ropui tak a ni, a ti a. Sawrkarin sawhthing, aieng, hmarcha leh hmunphiahte lei turin chak taka hma a lak thu tarlang a. Kuthnathawktute hmakhua ngaia theihtawp chhuah thintu IFAD-FOCUS thawktute hmalakna fakawm a tih thu sawiin, FOCUS project thar kalpui tura hmalak mek a nih thu leh tun aia nasa zawka tanlak tum a nih thu a sawi a. Ram changkang zawkte tih theih angte ti ve zel thei turin ngaihtuahna sen a tul tih sawiin, kalkhawmte chu tun dinhmun aia sang zawka zoram siam tur leh kuthnathawktute dinhmun chawikan kawnga tanlakpuiah a sawm a. IFAD-FOCUS Mizoram Buyer Seller Meet 2024 buatsaih chuan hmasawnna rah tha zawk a thlen ngei a beisei thu a sawi bawk.
He hun kaihruaitu Pi Ramdinliani, Secretary, Agriculture and Farmers Welfare Department chuan FOCUS hmalakna kaltlanga hmasawnna hrang hrang hmuh a ni chu lawmawm a tih thu sawiin, thlai thar chhuah leh sawngbawl mai bakah thar chhuah hnua enkawl leh cheibawl zui kawngah mawhphurhna hrang hrang neite kan tanrual a tul hle a ni, a ti a. Mipuite chu ram chhung thar chhuah ngeite ngaihhlut nachang hriaa dawr taima tura sawmin, a zuartute lam pawh an tana hlawkna tur chauh ngaihtuah lova a leitute tana lei ngam tur tinzawna a man bithliah thiam turin a chah a. Teirei peih tur leh mahni kutkawiha ding chhuak thei tura tan la turin a fuih nghal bawk. 
He hunah hian Pi Lalengzami Haolai, Jt. Director, Agriculture and Farmers Welfare Department and State Project Director, FOCUS in lawmthu sawiin hun hman a khar a. Hemi hnu hian khuallian leh sawm bik te'n Stall hrang hrangte fangkualin loneitu 26, DMU FOCUS, FPO/FPC 4, Innovation Fund Awardees 7 leh Entrepreneur-te thil zawrhte an enfiah a ni. 
IFAD-FOCUS Buyer Seller Meet 2024 hawnna hunah hian Pu C. Lalremliana, Chairman, MKVIB, Dr. H. Saithantluanga, OSD to Agriculture and Farmers Welfare Minister, Pu C. Lalmalsawma, Jt. Director, Agriculture and Farmers Welfare Department leh official pawimawh dangte an tel a ni. 
He hunah hian FOCUS Project hnuaia District hrang hrang 6 atanga Farmers Interest Group (FIG) leh Entrepreneur, Society leh Farmers Producer Organisation (FPO), thlanchhuah te'n stall 40 chuangah an thlai tharchhuah leh eitur chi hrang hrang sawngbawl sate phochhuakin an zuar chhuak a. Mizoram chhung leh pawn atanga eitur zuar thin leh sawngbawla zuarchhuak thin mi engemawzat he hunah hian telin District hrang hrang atanga thlai thar chhuaktute leh eitur sawngbawl thinte nen insumdawntawnna tha zawk neih a nih theih nan indawrna an kalpui a, ruahmanna an siam a ni.
FOCUS Project huaihawtin Buyer Seller Meet hi July, 2023 khan neih a lo ni tawh a, rahchhuah tha tak hmuh niin Aizawl khawpui chhunga ei leh in siam leh zuarchhuak thinte chuan farmer engemawzatte nen mumal takin sumdawnna ngelnghet tak an kalpui a, tun thlengin an la indawr chho mek a ni.

Attachment

  • Loading attachment...