1220/2024-2025
July ni 19, 2024: Vawiin khan Power & Electricity Minister Pu F. Rodingliana hovin chhimlama kawlphetha pek kawnga harsatna hrang hrang leh a chinfel dan tur bialtu MLA-te leh Power & Electricity Department Official-te nen Power Minister Chamber-ah an sawiho.
He meeting-ah hian Dr. Lorrain Lalpekliana Chinzah, Lawngtlai East bialtu MLA leh Adviser to Chief Minister ni bawk te, Lawngtlai West bialtu MLA Pu C. Ngunlianchunga, Tuichawng bialtu MLA Pu Rasik Mohan Chakma, West Tuipui bialtu MLA Pi Prova Chakma leh Palak bialtu MLA Pu K. Hrahmo te an tel a. MLA te hian an bial chhunga harsatna hrang hrang te an sawi a, P&E Official te nen, Minister kaihruaina hnuaiah sawihona chipchiar tak neih a ni.
Tunhnaiah chhim lamah power supply a mumal lo hle a; Damdep khua leh a chheh velte phei chuan hun rei tak chhung power an hmuh tawh loh thu sawi lan a ni a. He hunah hian Power supply thatlohna chhan leh ti tha tura hmalakna kal mekte hetiang hian sawi a ni-
1) Chhim lam chawmtu Khawiva leh Chawnhu inkar line-ah harsatna a awm thin vang a nih thu an sawi a. August, 2023 khan Khawiva-ah 25MVA, 132/33kV Transformer dah belh a ni a, a hma lawkin 132kV Sub-Station, 2x25MVA Kawmzawl, Lunglei hawn thar a ni bawk a. Heng avang hian chhim lamin duhtawka hnianghnarin, restriction awm lova power an draw theih tak avangin, power mamawh lo sang zel bawk nen Khawiva leh Chawnhu inkar line hian a zo ta lo a, a chhiat phah ta fo thin a ni. Tunah hian 132kV Sub-Station, 2x25MVA Chawnhu-ah siam mek a ni a, hna hi 70% vel zawh tawh a ni a, hemi chawm thei tur hian Khawiva leh Chawnhu inkar line upgrade leh siamthat hna hi furpui zawh veleh thawh tum a ni a, hei hian Khawiva leh Chawnhu inkar line harsatna a sukiang nghal dawn a ni.
2) May ni 27, 2024 zana Remal Cyclone tleh leh ruahsur avangin Chhim lam power pekna hnar ber Melriat to Khawiva 132kV tower, Aibawk thlanmual hnuaiah leiminin a hnawl a; power distribution network tam tak a chhia a, heng bakah hian tun hnai chhoah NHIDCL kawng laih avangin ban tlu, ban sawn ngai leh lung hal avanga hrui den chah te avangin power supply a khaihlak nasa hle bawk. Siamthat hna thawhna kawngah kum dang zawng aiin fur ruahtui a tam avangin hnathawh a harsa a. P&E Dept.-ah hnathawktu indaih lohna a lian hle a, hun pangngaia kal theih hram hram kha, harsatna lian (Natural Calamity) a lo thlen meuh chuan thawktu indaihlohna hian nghawng a nei nasa lehzual a, hei vang hian siamthat hnathawh pawhin hun a duh rei leh zual a ni.
3) December, 2023 khan Chawnhu Sub-Station Panel a kang a, hei vang hian Siaha District, Bungtlang S area, Chawnhu leh Kawlchaw feeder chawm te’n power an hmuh that theih loh phah a ni. A bik takin Bungtlang S area power pekna 11kV line hi 492km lai a thui a ni a; hemi area chhunga chhiatna a awm hlekin an vai thim vek thin a, a hmawr tawnga awm - Damdep, Parva, Vathuampui leh Tuithumhnar thlanglam te’n an tuar nasa lehzual a ni. Heng harsatna ching felna tur hian 33kV Sub-Station Bungtlang S-a sak mek chu hawn thuai tum a ni a, hei hian heng lai area a harsatna tam zawk chu ching fel tura beisei a ni. Chawnhu panel chhia pawh panel hman hlui la khawmin thlak fel a ni tawh a, mahse duhthu a la sam lo hle a, chuvangin, a thar lei turin order siam tawh a ni a, panel thara thlak theih thuai beisei a ni. Heng bakah hian chhim lam power network tih changtlunna tura mamawh hrang hrangte pawh a tahtawla a theih ang anga lei tum a ni.
Power Minister Pu F. Rodingliana chuan power-a intodelh tur leh mipuiten power tha taka an hmuh theihna turin Sawrkar-in chak takin hma a lak chhoh mek thu a sawi a. Hemi kawngah hian an hun hlu tak senga bialtu MLA te nen an harsatna leh an ngaih pawimawhte an sawiho theih avangin lawmthu a sawi a; eng hunah pawh inthlahrung lova an mamawh te ama hnenah emaw, bialtu official te hnenah emaw thlen a, fin chhuah zel turin bialtu MLA-te a ngen a ni.
He hunah hian Power & Electricity Department Official-te hi Er. H Zonunsanga Engineer-in-Chief in a ho a, Er. Lalnithanga CE (SO), SE (Planning) leh Lunglei Power Circle hnuaia Engineer te an tel a ni.
Attachment
- Loading attachment...
