388/2025-2026

Aizawl , the 29th of April, 2025: Vawiin chawhnu khan LESDE Directorate Conference Room, Earth Day Road, MINECO ah Ministry of Labour & Employment hnuai a Employees’ State Insurance (ESI) Act, Mizoram a chak zawk a kalpui a nih theih nan 2nd Meeting of Employees’ State Insurance Corporation Regional Board Mizoram’ neih a ni.

Pu Lalnghinglova Hmar, Minister of State, Labour, Employment, Skill Development and Entrepreneurship (LESDE) Department chuan meeting hi kaihruaiin, ESIC chu mipuite tana thil tangkai tak a nih thu a sawi a. Mi tam zawk an inziahluh theih nan uar takin awareness campaign kalpui nise a duh thu leh, Aizawl-a ESI hospital din a nih thuai theih na’n chak taka hma lak a pawimawh thu a sawi a, bawhzui zel a tum thu a sawi lang. 

Pu Robert Guite, Regional Director, ESIC, NE Region, SH. Pranay Sinha, Insurance Commissioner, North East Zone, Dr. Hiranmayee Sarma, State Medical Officer, ESIC, Guwahati leh officials kal khawmte chuan Mizorama hmalakna kalpui tawh dan leh hmachhawpte an tarlang a. Kum 2023-2024 chhungin ESIC ah mi 2710 inziak lutin, tun dinhmunah mi 6180 an inziak lut tawh a, India ram pumah ESIC hian Hospital 161, Dispensary 1574, Medical College 13 a thawhpui mek bakah, Insured Person (IP) fate tan ESIC Medical College 6-ah seat reservation a awm tih a tarlang a ni.

Employees' State Insurance (ESI) Act hi Aizawl Municipality huam chhungah December ni 1, 2015 atang khan kalpui tan a ni a. Branch Office hi February ni 8, 2016 ah hawn niin tun ah hian R.Z. Annex Building, House No. A-107/E, 4th Floor, Zodin Square, Tuikual South, Aizawl - 796001, Mizoramah Branch Manager leh Staff-te nen kalpui a ni. ESI Dispensary pawh Zaluta Building, 1st Floor, Venghlui (Near Treasury Square), Aizawl-ah hawn a ni.

ESI Scheme, Aizawl hian damdawiin panga (5) leh diagnostic centre pathum (3) te nen an  inthlunzawm a ni, chungte chu :

1. Synod Hospital, Durtlang

2. State Referral Hospital, Falkawn

3. Aizawl Adventist Hospital, Zotlang

4. Nazareth Hospital, Chaltlang

5. Greenwood Hospital, Bawngkawn

6. Trinity Diagnostic Centre, Zarkawt

7. Genesis Laboratory, Dawrpui

8. Cross Imaging, Dawrpui        

ESI hnuaia inziak lutte'n heng damdawiin/diagnostic centre-ah hian a thlawnin treatment (OPD/Admit/Tests chi hrang hrang) an dawng thei a. ESI Dispensary hian heng damdawiinahte hian a tul dan a zirin damlote an thawn thin a, senso zawng zawng tunsak vek an ni. 

Employees' State Insurance Corporation (ESIC) hi Ministry of Labour & Employment, Govt, of India hnuaia Statutory Body niin hnathawktute ESI Act 1948 in a huam te chu:-

1. Sickness Benefit

2. Medical Benefit

3. Disablement Benefit

a.    Temporary Disablement Benefit

b.    Permanent Disablement Benefit

4.    Dependents' Benefit

5.    Maternity Benefit

6.    Confinement Expenses

7.    Funeral Expenses

8.    Rajiv Gandhi Shramik Kalyana Yojna (RGSKY), Unemployment Allowance

9.    Covid Relief Scheme (CRS)

10. Atal Beemit Vyakti Kalyan Yojna (ABVKY) 

11. MBBS Quota for ward of IP 

Heng te bakah khian Ayushman Bharat-Pradhan Mantri Jan Arogya Yojana (AB-PMJAY) leh ESIC te’n thawhhona thuthlung an ziak tawh bawk a ni.

ESI Scheme chuan eng sumdawnna pawh (Road Transport, Hotels & Restaurants, Cinemas, Newspaper, Shop, Educational/Medical Institution etc.), hnathawktu 10 (sawm) emaw a aia tam awmna te a huam vek a. Hnathawktu thlakhat a Rs. 21,000/- leh a aia tlem hlawhte tan he hamthatna hi dawn theih a ni.

ESI Act hnuaia hmathatna chang tur hian inziahluh hnuah hnathawktuin a hlawh atanga za zela 0.75% leh a chhawrtuin za zela 3.25% thla tin an chhun luh ve a ngai thung a ni. 

ESI Act chungchang hrechiang duhte tan, Pu David Lalfakzuala, Assistant Director, Office Landline No. 0389-2913623 leh Mobile No. 9999573504 ah emaw LESDE Directorate, Earth Day Road, MINECO ah zawhfiah theih a ni.

Vawiina meeting-ah hian Mizoram Private School Owners Association, Mizoram Hospital Owners Association, NTUM, FOTUM, CITUM leh LESDE Department-a hotute an tel a ni.