389/2025-2026
Aizawl, the 29th April, 2025: School Education Minister Dr. Vanlalthlana chuan Mizoram Board of School Education (MBSE) buatsaih HSLC Examination 2025 result vawiin April ni 29, 2025 tihchhuah a ni ta chu lawmawm a tih thu a sawi. HSLC Exam result a hun taka chhuah a nih theih nana thawktute, MBSE officer leh staff-te, zirtirtute leh thawktu dangte thawhrimnaah lawmthu a sawi a, an tanrualna avangin result lawmawm tak kan hmu a ni, a ti.
Minister chuan HSLC result tihchhuah takah zaa 76.68 zet an pass thei chu lawmawm a tih thu leh, kum hmasaa passed percentage zaa 73.37 khum a ni chu a lawmawm hle a ni, a ti a. Zirlai hlawhtlingte chu thinlung taka a lawmpui thu a sawi a. An kal zelna turah ram tana chhawr tlak hlawhtlinna paw chhuak ngei tur leh ram leh ram hmangaihna rilru nena lehkha zir zel tura a duhsak thu a sawi a. Exam beitu hlawhtling zo ta lo zirlaite chu a tawrhpui thu leh an hlawhchhamna chu beidawn nana hmang lova, tumruhna nasa zawk neih phah nana hmang tura a duhsak thu a sawi a. Tun tuma an hlawhtlin rih lohna chu zirna chawlhsan nan hmang mai lova ngawrh zawka zirna hmachhawn nan hmang tura a duhsak thu a sawi bawk.
Education Minister chuan school 107 zetah an candidate neih zawng zawng an pass vek chu lawmawm a tih thu sawiin, an thawhrimna leh tanrualna hi a chhuanawm hle a ni, a ti a. Hun lokal zel turah pawh result duhawm tak neih chhunzawm zel turin duhsakna a hlan a. School 13-ah an candidate-te an fail vek chu pawi a tih thu leh heng school-te hian hmasawnna paw chhuak turin theihtawp chhuah se a duh thu sawiin, zirlaite leh nu leh pate tibeidawngtu ni lo tura a duh thu a sawi bawk.
