2034/2022-2023

Aizawl 23rd September 2022: Vawiin khan LESDE leh Central YMA te buatsaih cement mistiri training kharna  Central YMA Hall Tuikhuahtlang Aizawl-ah neih a ni a, LESDE Minister Pu Lalchhandama Ralte-in khuallian niin a hmanpui.

Minister chuan he hunah hian thusawiin cement mistiri training chhuak te chu ram leh hnam mamawh chhanna ni tur leh eizawn nana hmang ngei turin a chah. Minister chuan Mizo mipuite tana chhawr chakawm ni tur te, mahni invawng a, hnathawhna hmuna kal hma tur te, hlawhtling tura taima leh tei rei peih ni tur te, hlawh tlem deuh pawha bul țan peih tur te leh midang pawh chher chhuak thei tur tein a fuih bawk.

Pu Lalchhandama Ralte chuan cement hnathawhah hian Mizoten kan thawh ve theih rengah hnamdangin min chim ral mek a, hemi laka ram chhantu ni thei tur hian training chhuakte an pawimawh tih hrilhin hnamdangte aia chhawr nuam ni turin a fuih. Cement hna a tam tawk tih sawiin hnathawh dan phung a țhat phawt chuan thawh sen loh a awm a, mi tam zawk an zuan luh zel theih nan țan lak a pawimawh a ni a ti.

Minister chuan ram changkang USA-ah te chuan țhalaite hnathawk turin zing ațangin an chhuak suau suau a, hnathawk lo an awm lo. Kan ramah chuan țhalaite zing karah an tho hlei thei lo a la ni si, hnathawh dan phung siamțhat a, țhalaite hnathawk lo thei lova siam a țul tawh hle a ni a ti bawk.

Pu Lalramsanga Secretary LESDE pawhin he training kharna hunah hian thu a sawi a, Mizo țhalai hnathawk tura inchher hriam kan nei hi kan ram leh hnam damna tur a ni a ti a. Mizo țhalai a tam thei ang ber hnathawk thei tura inchher zel a pawimawh a, theka system hluar zel tur dan nan te pawh a pawimawh a ni a ti bawk.

Central YMA hian Cement mistiri training vawi 16 an buatsaih tawh a, alluminium mistiri training vawi 3, Floor tile mistiri training vawi 3 an buatsaih tawh a. Tun țum training hi August 23,2022-ah țan a ni a, ni 31 chhung theory leh practical-in an zir a, mi 48 in he training hi an zo a ni. Mistiri training zo te hi certificate leh mistiri bungrua pek nghal an ni.

Cement Mistiri training kharna inkhawm hi Pu R.Lalngheta Central YMA President-in a kaihruai a, Prof Malsawmliana Asst Secy CYMA in report a pe a, Mistiri training chhuak te leh CYMA hruaitu țhenkhatte an tel a ni.