560/2025-2026

Aizawl, the 11th of May, 2025:  Nimin khan Pu Lalnghinglova Hmar, Minister of State, Labour, Employment, Skill Development and Entrepreneurship (LESDE) leh Pu Atul Kumar Tiwari, Secretary to Government of India, Ministry of Skill Development and Entrepreneurship leh LESDE Department hotute chuan Mizorama Skill leh Entrepreneurship hmasawnna tur an sawiho. 

Aizawl Peak Restaurant-a inkawmnaah Pu Lalnghinglova Hmar chuan MSDE Secretary-in Mizoram a tlawh chu lawmawm a tih thu leh hmasawnna a thlen ngei a beisei thu a sawi a, "Kan sawmna ngai pawimawha Mizorama Skill leh Entrepreneurship lama hmasawnna tur a hmun ngeia i rawn zir hi kan lawm takzet a ni," a ti a; Pu Tiwari hian LESDE Minister-in a sawmna tihhlawhtlinga lo zin a nih thu a sawi ve bawk. 

LESDE Minister chuan sorkar laipuiin Upgradation of ITI kalpui tura sum țhahnem tak a dah chu Mizoramin a chhawr theihna tura remchanna siam turin a ngen a, India rama a hmasa ber tura Sports & Skills țhui khawm tura Mizoram sorkar rawtna (proposal) thehluh chu pawmsak turin a ngen bawk. LESDE Department bakah Mizoram Youth Commission leh Mizoram State Sports Council-ten May 10 zana inhmuhkhawmnaah hian presentation an pe a, hengte hi theih anga lo bawhzui a tum thu MSDE Secretary chuan a sawi. 

Pu Tiwari chuan Mizoram a thlen hnuah LESDE Department tih tak takna leh hmasawn duhna a hmuhin lawmthu a sawi a, ITI-a training neite pawh an hmanraw neihte țha tawk lo mah se thiam duhna tak tak an neia a hriat thu leh, sorkar laipui ațanga puih theihna awm angte a ngaihtuah tur thu a sawi. 

Sorkar laipuiin Skill hmasawnna tura scheme a neihte leh a kalpui mekte zir chiang turin LESDE Department thawktute Delhi-a kal turin a sawm a, Ministry lamah biak țul angte a lo biak fel tur thu a sawi bawk. 

Pu Atul Kumar Tiwari hian zan khat riakin Aizawl a tlawh a, Industrial Training Institute, NIT, National Institute of Electronics & Information Technology (NIELIT) bakah Mizoram Badminton Centre, Zuangtuia grassroots badminton training kalpui mekte a tlawh bawk a ni.

Inrinni zana 'Discussion on State Vision and way forward' hun hmanaah hian Pu Lalmalsawma Pachuau, Secretary LESDE hoin an department official-te an tel kim hle a, Pu Henry C Lalrawnkima, Secretary MSSC leh Pi V Lalmuanpuii, Secy Mizoram Youth Commission leh official dangte an tel a; Indian Institute of Entrepreneurship, Guwahati ațangin an hotute an tel bawk.