2615/2026-2027

Dated Aizawl, the 9th October 2026: Labour, Employement, Skill Development and Entrepreneurship Minister, Pu Lalnghinglova Hmar chuan vawiin khan Government Aizawl North College-ah ni hnih awh seminar - " Youth and Culture in Northeast India : Intersections and Perspectives" kharna hun a hmanpui a, thalaite chu mahni hnam ziarang hrechiang a, thil thar hmachhawn hreh lo turin a chah a ni.

Minister chuan he hun buatsaihtute chungah lawmthu sawiin thalaite hmasawnna chu Northeast India hmasawnna a ni tih hrechiangtute ni a a hriat thu a sawi a. Culture kan tih chu thil sawhsawn theih loh, hmana kan tih tih dan ringawt a nih loh thu sawiin hun azirin a than danglam ve zel thu a sawi a. Chuvangin Mizo hnam ziarang kan tih chu thangtharte than ruala thang vel zel a nih avangin thalaite chuan tunlai nunah an seng luh thiam a pawimawh hle thu a sawi a ni.

LESDE Minister chuan thalaite hlawhtlinna chu sawrkar hna an hmuh leh hmuh loh ringawta teh tur a nih loh thu sawiin an thiamna leh tuina zawng tak hmanga ei an zawn theih chu a pawimawh zawk thu a sawi a. Tun maiah pawh India ram aiawha chhuak, Asian Games Hockey Tournament-a Gold Medal la thei Mizo hmeichhia pahnih ngawt mai kan nei chu Mizote'n theihna kan neih san zia tilangtu chiang tak a nih thu sawiin thalaite'n an thiamna leh theihna te an hai chhuah theihna turin Tourism bakah kawng hrang hrangah hma an lak zel tur thu a sawi a ni.

Thalaite chu eng hna nge an zawn ang tih inzawt lo va engtin nge thil chhenfakawm leh hlu ka siam theih ang tih inzawt fo zawk turin a chah a. Chumi ti thei tur chuan hnam dang tih dan ringawt entawn mai lo va, mahni ram leh hnam ziarang hrechiang a, a mawina leh hlutna haichhuah tum zawk turin a chah a ni.

Vawiin Seminar-ah hian Dr. Charisma Lepcha, Assistant Professor, Dept. of Anthropology, Sikkim University; Dr. Margaret L. Pachuau, Professor, Dept. of English and Culture Studies, Mizoram University leh Pu Adam Saprinsanga, Editor, The Frontier Dispatch te chuan Panel Discussion neiin Prof. Margaret leh Dr. Lalrinsangi te hnen atangin paper presentation ngaihthlak a ni a. Dr. Nishant hnen atanga Conference Report ngaihthlak a nih hnuin Dr. Ramdinthari'n lawmthu sawiin hun a khar a ni.