3096/2024-2025

New Delhi, the 20th of November, 2024: Vawiin chawhma khan Pu Lalnghinglova Hmar, Minister of State, Labour, Employment, Skill Development & Entrepreneurship (LESDE) Department chuan New Delhi-a Kaushal Bhawan-ah Pu Jayant Chaudhary, Minister, Ministry of Skill Development & Entrepreneurship (MSDE) a hmu a, skill development-a Mizoram hmathlir leh mamawhte a sawipui.

LESDE Minister Pu Lalnghinglova Hmar chuan “Mizo thalaite’n skill-ah talent tha tak an nei a, India ram pum huap intihsiakna, IndiaSkills Competition-ah pawh medal engemawzat lain, WorldSkills Competition-ah Mizoram atangin India aiawh pahnih an tel, ” a ti a. Mizo thalaite theihna haichhuak tak tak turin Mizoram-ah Skill Development Centre changkang leh lian tham neih a tul thu Union Minister hnenah ziakin a thlen. Union Minister chuan tihpuitlin ngei a tum tur thu a lo hrilh a ni. 

Pu Lalnghinglova Hmar chuan  MSDE hnuaia peng pawimawh tak pakhat, Sports, Physical Education, Fitness and Leisure Skills Council (SPEFL-SC) kaltlangin sports kaihhnawih job role hrang hrangah skill development training a taka kalpui theih dan tur sawiin, he mi hmang hian Mizo thalaite tuina leh thiam zawng pahnih – sports leh skill development kaihkawp theih nia a hriat thu leh, hemi chungchang hi ziaka Union Minister hnenah a thlen tawh thu a sawi a; Union Minister chuan hemi chungchanga Mizoram Sawrkar lehkha thehluh a lo hmuh tawh thu leh tha a tih thu a sawi a, MSDE hnuaia Sports Sector Council-ah a kalphung ennawn mek a nih thu LESDE Minister hi a lo hrilh a ni. 

LESDE Minister hian nimin tlai khan Pu Chanchal Kumar, Secretary to Government of India, Ministry of DoNER pawh New Delhi-a a office-ah a kawm a. DoNER chu Northeast State te tana Ministry pawimawh tak a ni a, he Ministry hnuaia sports project dil theih loh emaw tih thin chu hriatsual palh a nih thu an sawidun. DoNER Ministry hnuaia Mizoram project leh sum dinhmun te thlirdunin, State Sawrkar anga hmalak ngai te pawh an sawi dun nghal a ni.

Meeting-ah te hian Pu John Tanpuia, Director, LESDE Department leh Pu H. Lalramenga, PS te’n Minister hi an tawiawm a ni.