609/2025-2026

Guwahati, the 28th of May, 2025: Vawiin khan Pu Lalnghinglova Hmar, Minister of State, Labour, Employment, Skill Development & Entrepreneurship (LESDE) chuan Indian Institute of Entrepreneurship, Guwahati tlawhin IIE Director Ishwar Chanabasappa Poojar nen an inkawm a, Mizorama skill leh entrepreneurship lama hmalakna awm theite an sawi dun.

LESDE Minister Pu Lalnghinglova Hmar chuan, "IIE hi a thawm kan hre țhin a, Mizoramah hian kan la chhawr țangkai tawk lo. IIE kal tlanga skill leh entrepreneurship lama hma thar lak kan duh a, Mizoram nen inthlunzawmna țha kan mamawh a ni," tiin Ministry of Skill Development and Entrepreneurship hnuaia awm a nih angin LESDE Department nen țan kawp a țul dante a sawi.

IIE Director chuan Mizoramah a taka hna an thawh tawh tur thu leh a bul țanna atan sikul thlan chhuah țhenkhatah rain water harvesting tih dan inzirtirna neih a, a hmanruate leh a hnathawktute thlangin IIE kaltlangin ruahtui khawl leh a vawn himna an ngaihtuahsak dawn bakah naupangte tui ren chem, tui thianghlim khawl kawnga kaihhruaina pek paha entrepreneurship an zirtir tur thu a lo hrilh.

IIE lam hian Mizorama tourism hmasawnna turin entrepreneurship keng tel project siam an duh thu leh, chumi kawngah chuan Mizorama sorkar department hrang hrang telna meeting neiha ke pen an duh thu an sawi chu Tourism Minister ni bawk Pu Lalnghinglova Hmar chuan tihhlawhtlin a nih tur thu a hrilh.

Pu Lalnghinglova Hmar chuan IIE hnuaia scheme kalpuite chu Mizoram chhunga an tih dawnah MSDE zawmtu department LESDE hriattir tur leh, anmahni kal tlanga kalpui țhin turin a chah a; sorkar laipui, PSU leh funding source dang ațanga skill leh entrepreneurship kawnga hmasawnna hna awm reng rengte chu LESDE Department an hriattir ziah țhin tur thu leh a rang lama email-a an umzui tur thu IIE Director chuan a sawi.

IIE kal tlanga training, capacity building leh scheme hrang hrang kalpui țhin chu tihlen an tum thu leh chak zawka kalpui turin sorkar laipui lamin an hrilh thu Director chuan a sawi a, tun hnaia a hna a zawm thar hnua hmar chhaka hmasawnna hnathawh kalpui chhoh dan report a pe bawk.

LESDE Minister hi Dr. Saithangpuia, Deputy Resident Commissioner, Guwahati Mizorawm House-in a țawiawm a ni.