1834/2024-2025

Aizawl, the 30th of August, 2024: Nimin tlai khan Pu Lalnghinglova Hmar, Minister of State, Labour, Employment, Skill Development & Entrepreneurship Department leh Pu Atul Kumar Tiwari, Secretary to Government of India, Ministry of Skill Development and Entrepreneurship (MSDE) te chu Kaushal Bhawan, New Delhi-a MSDE Secretary office-ah an inkawm a, Mizorama skill development hmasawnna tur kawng hrang hrang an sawidun. 

LESDE Minister Pu Lalnghinglova Hmar chuan Sawrkar laipuiin ITI tihhmasawnna tur scheme lian tham a ruahman chu lawmawm a tih thu sawiin, Mizoram pawh he scheme mamawh ber zing a mi a ni, a ti a; ITI Upgradation scheme chungchanga Mizoram Sawrkarin rawtna hrang hrang a neihte a thlen nghal a ni. Mizoram chu Industry lian tham awm lohna a nih avangin kawng thenkhatah ngaihhnathiam a ngai dawn tih sawiin, Mizo thalaite tuina leh thiam zawng nena inmil job role Mizoram tan neih a pawimawh a ni a ti a. Tun dinhmunah Mizoramah ITI ah pathum awmin, Government ITI, Aizawl chu India rama ITI titha zingah a tel a, ITI sak mek pali a awm bawk. 

MSDE Secretary chuan Minister rawtna thlente chu thil pawimawh tak tak a nih hlawm thu a sawi a. Mizoram Sawrkarin harsatna a neihte nen chiang zawkin ziak a thlen leh nise tiin an sawidun a ni. LESDE Department Officer-te nen meeting neih thuai a duh thu Secretary chuan a lo sawi bawk. 

Pu Lalnghinglova Hmar chuan MSDE hnuaia scheme pakhat, Pradhan Mantri Kaushal Vikas Yojana (PMKVY) chungchanga thawktute’n harsatna an tawh thinte pawh Secretary hnenah hian a thlen a. Scheme chungchanga mawhphurtute koin a chinfel dan tur ruahmanna an siam nghal a ni. 

MSDE chuan PMKVY 4.0 hnuaiah Mizoram tan Special project siamin, March ni 1, 2024 khan cheng vaibelchhe 31.06 an rawn ruahman a. Mizoram State Special Project hnuaiah hian thalai 10,000 chuang skill training pek tum niin, tunah hian registration kalpui mek a ni a, training centre thenkhat chuan training an kalpui tan tawh nghe nghe a ni.