1835/2024-2025

Aizawl, the 30th August, 2024: Transport Minister Pu Vanlalhlana chuan vawiin chawhma dar 10:00 khan Hlimena lirthei endikna leh certificate pek chhuahna tura ruahman Inspection & Certification Centre (I&C Centre) sak mek tlawhin hmalaknate a enfiah a, Transport Department hotute leh hna thawktu Company-te chu hmalak zui zel dan tur a sawipui.

Transport Minister Pu Vanlalhlana chuan lirthei endikna leh certificate pawimawhte pekchhuahna tur Inspection & Certification Centre, Hlimen chu Mizoram tana hmasawnna ruhrel pawimawh tak tur a nih thu sawiin, hemi kaihhnawih hna thawktu Company leh a viltu Line Department-te chu theihtawp chhuah turin a chah a. Hna tha leh tlo, ram leh hnam tana chhawrnahawm tak tha taka puitlin a nih theih nana thahnemngai taka hma la turin a chah a ni.

Transport Minister ho hian I&C Centre kentel pawimawh tak Inspection Shed leh Administrative Building sak mekte bakah project kentel dangte enfiah a ni a. Tunhnai ruahsur nasa avanga I&C Centre sakna hmunhma leh a chhehvela harsatna thlengte pawh enfiah niin, PWD nena inrawntlanga tui luankawr mumal leh tha zawk siam dan turte bakah inkalpawhna mumal tak siam dan turte pawh enho a ni bawk.

Inspection & Certification Centre, Hlimen hi Sawrkar laipui Ministry of Road Transport & Highways (MoRTH), Mizoram Sawrkar Transport Department leh Central Institute of Road Transport (CIRT), Pune, Maharashtra te'n thawhhona thuthlung tripartite MoU an ziah anga kalpui a ni a. Cheng vaibelchhe 15.50 senna tur niin, senso za zela 90 hi Sawrkar laipui tum tur niin, a bak za zela 10 hi State Sawrkarin a tum thung ang. Tun dinhmunah hian Sawrkar laipui atangin cheng vaibelchhe 5.34 hmuh tawh niin heng zinga cheng nuai 34 hi direct-in CIRT, Pune-ah MoRTH kaltlanga pek a ni. State Sawrkar atangin cheng nuai 54.40 hmuh a ni tawh bawk.

Administrative Building leh Inspection Shed sakna hi e-Tender kaltlangin M/S Vinco Construction, Edenthar kutah pek a ni a, Civil Works hi kumin financial year chhung hian zawh fel hman tum a ni. Sak zawh fel a nih hunah MoRTH duhdan angin Automated Testing Station (ATS) ah puan tur a ni a. Mizoram chhunga lirtheite fitness chu he hmunah hian khawl hmanga en tawh tur a ni ang. Thawhhona thuthlung ziah ang chuan peihfel a nih hnu kum hnih chhung chu CIRT, Pune te'n an enkawl phawt dawn a, Transport Department staff-te training an pe ang a, kum hnih hnuah Transport Department kutah an hlan tawh ang.

He hunah hian Minister hi Pu C. Lalzahngoa, Secretary, Transport Department, Er. R. Lalrammawia, Director, Transport Department leh Official dangte bakah M/S Vinco Construction hotute'n an tawiawm a ni.