1836/2024-2025

Aizawl, 30.08.2024: India Sorkarin mi huaisen chawimawina a hlan thin zing a mi Sarvottam Jeevan Raksha Padak 2023 chu kum 11 mi Anthony Vanmawia, Tuirial Tlangveng hnenah mahni nunna hlana a nau tui tla a chhanchhuah avangin pek a ni a. He chawimawina hi vawiin khan a chhungte hnenah Aizawl District Bawrhsap Er. Lalhriatpuia chuan DC Office Conference Hall-ah a hlan a ni.

Anthony Vanmawia te unau hi April ni 17, 2023 khan tlaia an school bang chu khawlum lutuk avangin tuia inchiah dai turin luiah an kal a. Tuirial lui, Pachuau Li ah a nau Lalhmunsiama chu a chesual ta hlauh mai a. Anthony Vanmawia hian theihtawp chhuahin a nau hi a chhanchhuak ta a, amaherawhchu vanduaithlak takin a nunna hlu tak a chan ta a ni.

Aizawl Bawrhsap chuan Anthony Vanmawia thiltih chu ropui tiin, chhungkua leh khawtlang tan pawh thil chhuanawm tak a nih thu a sawi a. Amah awm tawhlo mah se a kalsan tak a chhungte ngaihsak zui zel turin khawtlang hruaitute chu a chah bawk a ni.

Kumin Republic Day pual a chawimawina hrang hrang dawng tur an puan zingah Sarvottam Jeevan Raksha Padak Awardee mi 3 an awm a. Anthony Vanmawia bakah hian Mizoram atang thovin Melody Lalremruati a tel bawk. He chawimawina hi mahni nun thapa midang nunna chhantute hnenah hlan thin a ni.

He Award hian medal leh chawimawina thuziak bakah pawisafai cheng nuai hnih a keng tel a. Sum hi direct in Home Department in an bank account a thun sak thin a ni. Vawiin hian Award hi Anthony a pu PC Ngursiamliana leh a pi Lalrinpuii ten an dawng a. Asst. Commissioner Pu Samuel Zodinsanga chuan kaihruaiin, Addl. DC Pu Mark Lalthanliana leh EO, BDO, DIPRO, DC Office a thawkte an tel a. Tlangnuam, DIPRO leh Tuirial Tlangveng VC leh YMA hruaitue bakah CYMA leh MJA aiawhte an tel bawk.