1837/2024-2025

30th August, 2024 : Statewise Scores of Food Safety, FSSAI-in a tihchhuahah Mizoram Score 14.5 chungchang leh Food Safety Index point inpek dan te hetiang hi a ni.

Mizoram in Food Safety Index-ah point kan hmu tlem a, amaherawhchu, Food Safety Index hi Ei/In thianghlim leh thianghlim loh tehna ngawr ngawr a ni lo va, point hmuh a hniam avanga kan Ei/In quality chhe ta hluah hluah anga ngaih tur a ni lo. Mizoram point hmuh a hniamna chhan chu hetiangin Mizoram Food & Drug Administration(FDA), Health & Family Welfare Department chuan a sawifiah -

Food Safety Index hi Food Safety and Standards Authority of India (FSSAI) in ram pum Food Safety tihhmasawnna atana a buatsaih thin a ni a, tehna (parameters) hrang hrang hmanga point pek ṭhin a ni. State dinhmun azir zelin point hmuh mai loh theihna tur thil tam tak a awm a ni.

Mizoram-in point a hmuh tlem avanga kan rama ei leh in kan neih leh sawngbawl dante hi chhia leh bawlhhlawh ta bik em ema puh theih a ni lo va. Chumi a lanchianna chu FSSAI hnuaia Food Safety Auditor-ten Aizawla kan hotel leh restaurant-te audit (hygiene rating) an rawn neihah chuan 5 star leh 4 star hmu pha an awm fur a. Hei hian a tak takah chuan kan food standards a hniam bik lohzia a lantir a ni.

Kan Ei/In neih leh sawngbawl dan hrim hrim hi state dangte nena khaikhinin Street Food Standards maiah pawh kan hniam bik reng reng lo va, State danga thleng fo Food accident pawi leh lian tham kan la tawk lo bawk. Bekang eisual avanga thihna/natna lo thleng zauh thin erawh a pawi hle a, mahse hei pawh hi Food Safety System that loh vang ni lovin, vanduaina thil a ni mah zawk awm e.

Point kan score lohna chhan langsar zualte hetiang a ni:-

1. Mizoramah Food Safety thawktu(manpower) kan tlem a, FSSAI-in kan neih zat tura min chhut sak kan pha lo nasa a, hetah mai pawh hian point hmuh ngaihna a awm lo.

2. Central Advisory Committee-a tel tur ten meeting an attend remchang lo va. Chu bakah State Level Meeting leh District Level Meeting pawh kum kalta khan neih a ni lo bawk. Hengahte hian point kan hmulo a ni.

3. Nikum Work Plan pawisa kan dawn har avangin food sample test turin draw hman a ni lo va, food licensing camp neih a ni lo bawk. Point hlohna vek a ni.

4. Eat Right Initiatives (eat right campus, eat right school, clean street food, clean fruit and vegetable hub) hi sum dawn loh avang bawkin hma lak a ni lo va, point pu vek an ni.

5. Court-ah emaw Adjudicating Officer hnenah emaw case register a ni lo bawk a, hei hi food sample test result azira tih tur a ni. Legal sample draw a nih loh avangin point hmuh ngaihna a awm lo a ni.

6. Danin Appelate Tribunal neih a phut bawk a, hemi kan la neih loh avangin point kan hmu lo.

Mizoramah hian Food Safety Officer (FSO) 2 chauh kan nei a, an tana Mizoram pum vil a har avangin district-a Drug Inspector-te chu an hna baka FSO hna lo thawk tura tih an ni a. Anni pawh mi tlemte an nih avangin food safety lamah thil tamtak an ti thei lo.

Kumin 2024 kum bulah khan FSSAI sumin FSO 7 (outsourse)-in lak an ni thei ta hram a, hmalaknain awmzia a neih phah ngei beisei a ni. Hemi bakah hian post thar thenkhat - Food Analyst, Asst.Food Analyst,  Designated Officer leh FSO te siam thar a ni bawk a, hnawhkhah a nih hunah kan state hmel chu nasa takin a danglam ngei ang.