No.7563/2020-2021

Fostering Climate Resilient Upland Farming System in the Northeast (FOCUS) project first installment kaltlanga A.H & Vety. Department, Champhai District, FOCUS Project ‘Mithun Shelter-Community Level and Water Supply Facility for Grazing Area’  kaltlanga Sial In sak - a dung feet 36 leh a vang feet 24 leh tuikhur siamte chu vawiin chawhnu khan Pu Lalzorama SE, Champhai Power Circle chuan hman theih turin a hawng.

Khuallian Pu Lalzorama chuan pipute hun ata tawha ran ngaihhlut ber Sial vulh kawnga Lianpui khuate hmalakna fakawm a tih thu sawiin, Sial chuan Mizote nunah hmun  pawimawh tak a luah tlat a ni, a  ti a. Lianpui khaw mipuite nena hun hmanho ani chu lawmawm tiin, AH&Vety Department leh Lianpui khuaa Sial vulhtute thahnemngaihna kaltlanga Sial vulh kawnga hmasawnna ruhrel duhawm tak siam chu tangkai taka hman a nih theihna tura duhsakna hlanin a hawng a ni.

Dr. B.Zonghinga, DVO Champhai chuan Sial vulh chu eizawnna tlak anih thu leh Mizote thinlungah a beh tlat avangin hralhna kawngah harsatna a awm loh thu a sawi a. Second installment pek chhuah leh mai tura buaipui mek anih thu pawh sawiin, harsatna awmte leh mamawh angte Sawrkarin a ngaihven reng thu a sawi bawk.

He hun hi Pu C.Sangthuama, Chairman, Sial Vulh Society, Lianpui chuan a kaihruaia. Upa Lalmuana'n hunserh a hman hnuah Pu C.Lalrosiama, Secretary, Sial Vulh Society Lianpui hnen atangin report ngaihthlak a ni a. Dr. C.Lalsawithuama, CVO Champhai hnen atangin Sial vulhtute tana hriat tur pawimawhte ngaihthlak a ni.

Undivided Champhai district chhungah Sial vulh khaw 20 an awm mek a, heng zinga khaw 10 thlan hmasak  Kawlbem, Vangtlang, Hnahlan, Tualcheng, Khuangleng, Lianpui, Sazep, Vangchhia, Samthang leh Farkawn-a Sial vulhtute hnenah FOCUS project kaltlangin  Sial vulh tanpuina leh chhawmdawlna pek chhuah a ni a. First installment kaltlanga tanpuina pek chhuah hmanga hnathawhte chu hawn zawh thawkhat a ni.

Lianpui khuaah hian Sial vulh  chhungkaw 11 awmin, Sial 120 an enkawl mek a ni.

Lianpui khuaa Sial In leh tuikhur siam hawnna hunah hian Pu Lalzorama SE P&E, Dr. B.Zonghinga DVO, Dr. C.Lalsawithuama CVO, Dr. Lallawmkima DIPRO, Dr.M.S Dawngliana VO, A.H Vety Department thawktute, Lianpui khua Sial vulhtute, VC leh NGO hruaitute an tel a ni.