Ramchhung hmun dang te rualin Librarian’s Day chu vawiin khan Aizawl-ah pawh State Central Library-ah inkhawm buatsaih a hman ve a ni a, Art & Culture Secretary Pu C. Thatkunga’n a hmanpui.
Art & Culture Director, Pu Ngurbiaka kaihhruai he ni hmanna ah hian Art & Culture Secretary Pu C. Thatkunga chuan Mizoramah tun dinhmunah hian library te hi duh ang in hman tangkai kan la thiam tawklo ni a hriat thu sawiin, library-ah hian hmasang thil hlu ziakna leh lehkhabu tha tak tak te dahkhawm a nih avangin mipui mimir pawh hian tun aia tangkai zawk a hmandan kan zir a tul a ni, a ti. Pu C. Thatkunga chuan librarian te chu mize hrang hrang nei lo dawngsawng tu leh library hmang tangkai tura lo kal te chhawn tu ber an nih avangin hawihawm leh a tangkai thei ang ber a midang te tanpui tu ni turin a fuih a. Pu C. Thatkunga chuan “Mizoram Chin Dan Thenkhatte” tih lehkhabu Pi K. Laldinpuii, Special Officer, Tribal Research Institute ziak a tlangzarh nghal bawk.
Librarian’s Day hi Father of Library Science, Dr. S.R. Ranganathan, piancham hriatreng na atan kum 1989 atang hman tan a ni a. Mizoramah chuan kum 2010 atang hman tan niin, tun tum hi a vawilina a ni. Librarian’s Day hi mi tam tak Library a lehkha chhiar tura hruai luh an nih theih nan leh library hman tangkai anih deuh deuh theih nan hman a ni.
Tun dinhmunah hian Mizoramah Recognized Library 495 a awm mek a. State Central Library ah hian lehkhabu 70,000- 80,000 a awmin, member 8643 (naupang 4200 leh puitling 4443) an awm mek bawk. State Central Library computerized hna chu thawh chhunzawm zel a ni bawk.
He ni denchhen hian kum 2012-2013 chhunga lehkhabu chhiar tha te hnenah lawmman sem a ni a. Lawmman dawngtu te hi Mizoram State Library member naupang 5 leh District Library, Aizawl a member puitling 5 an ni.
Lawmman dawngtu te:
Children Member, Mizoram State Library.
1. Lalhmunsiama S/o Lalchhandama, Bungkawn Vengthar.
2. C. Lalliankima S/o Lalnghilhlova, Khatla.
3. Vanlalsawmi D/o Laltanpuia, New Secretariat Complex.
4. Vinod Kumar S/o Bhim Bahadur, Bungkawn Vengthar.
5. Sammy Malsawmsanga S/o Lalfakzuala Bungkawn Vengthar.
Adult Member, District Library, Aizawl.
1. Laltanpuia Hnamte S/o Lianhleia (L), Chhiahtlang/ Sailam.
2. Ramzauzeli D/o Lalhliapi, Kulikawn.
3. C. Lalhmachhuana S/o Vanlalchhunga, Mission Venglai.
4. Maria Lalhmangaihi D/o Lalhmingmawia, Mission Veng North.
5. H. Lalhruaitluanga S/o H. Lalthlengliana, Mission Veng.
